У Магілёўскай вобласці дапамогу пацыентам з COVID-19 аказвае 5 міжраённых цэнтраў

У Магілёўскай вобласці дапамогу пацыентам з COVID-19 аказвае 5 міжраённых цэнтраў. Пра гэта расказала першы намеснік начальніка галоўнага ўпраўлення па ахове здароўя Магілёўскага аблвыканкама Ірына Ляховіч.

«У Магілёўскай вобласці дзейнічае 5 міжраённых цэнтраў, размешчаных у Горках, Крычаве, Клімавічах, Бялынічах і Быхаве, – адзначыла Ірына Ляховіч. – Рашэнне перапрафіляваць лячэбныя плошчы прынята тыдзень таму і звязана з аптымізацыяй аказання дапамогі ў раённых установах аховы здароўя, паколькі планамерна памяншаецца паток насельніцтва з каранавіруснай інфекцыяй. Таму распрацаваны алгарытм дастаўкі пацыентаў з шэрагу раённых бальніц у міжраённыя цэнтры. Астатнія ўстановы аховы здароўя або ўжо перапрафіляваныя, або да канца тыдня будуць перапрафіляваны для аказання планавай медыцынскай дапамогі».

Шпіталізацыю пацыентаў з COVID-19 працягваюць Шклоўская і Асіповіцкая раённыя, а таксама Бабруйская цэнтральная бальніцы. У апошнюю ўстанову накіроўваюць хворых з найбліжэйшых раёнаў – Клічаўскага, Кіраўскага і Глускага. У Магілёве пацыентаў з COVID-19 прымаюць у абласным супрацьтуберкулёзным дыспансеры, інфекцыйнай бальніцы, Магілёўскай бальніцы № 1. На далечванне пацыентаў забірае абласная бальніца медыцынскай рэабілітацыі.

З сённяшняга дня пасля правядзення мерапрыемстваў па дэзынфекцыі ў звычайным рэжыме працуюць цэнтральныя раённыя бальніцы Краснаполля, Дрыбіна і Слаўгарада. Да аказання планавай дапамогі ў Магілёўскай бальніцы № 1 вярнулася артапедычнае аддзяленне, у тубдыспансеры – фтызіятрычнае, у Бабруйскай цэнтральнай бальніцы – неўралагічнае.

«Праца міжраённых цэнтраў працягнецца да канца гэтага тыдня, – склала Ірына Ляховіч. – Калі мы будзем назіраць далейшае падзенне захворвання, то і гэтыя раённыя цэнтры ў перспектыве будуць аптымізаваны. У такім выпадку асноўную нагрузку па кавід-пацыентах на сябе возьмуць установы аховы здароўя Магілёва і Бабруйска».

БЕЛТА