У Магілёўскай вобласці падыходзіць да завяршэння ўборка кукурузы на збожжа

У Магілёўскай вобласці падыходзіць да завяршэння ўборка кукурузы на збожжа. Палова раёнаў ужо ўправілася з гэтай важнай працай, паведамілі ў аддзеле інтэнсіфікацыі раслінаводства аблсельгасхарча.

У цэлым жа на 8 лістапада «каралева палёў» была ўбрана на 94% пасяўных плошчаў. Кожны гектар у сярэднім па вобласці дае па 53 цэнтнеры залацістай прадукцыі. Усяго ж намалочана 147 тысяч тон збожжа.

Днямі будзе скончана праца і на пасевах цукровых буракоў – убрана звыш 90%. Завяршылі яе ўсе раёны, дзе яна расце, акрамя Быхаўскага і Чавускага. У сярэднім па вобласці ўраджайнасць склала 336 цэнтнераў з гектара. У Горацкім раёне яна дасягнула 488 цэнтнераў.

Працягваецца нарыхтоўка кармоў для жывёлы на зімова-стойлавы перыяд. На ўчарашні дзень па вобласці мелася 1044 тысячы тон кармавых адзінак, што складае 27,2 цэнтнера кармавых адзінак на ўмоўную галаву жывёлы.

Вядзецца зяблевая апрацоўка глебы – яна праведзена на 69 % запланаваных для вясновай сяўбы плошчаў. Вывозяцца арганічныя ўгнаенні пад будучы ўраджай. Фініш палявых работ ужо побач.

zilmogilev.by