У Магілёўскай вобласці «Пункты дабра» сабралі першыя пасылкі для ўкраінскіх бежанцаў

Моладзь Магілёўшчыны перадасць Чырвонаму Крыжу гуманітарную дапамогу для ўкраінскіх бежанцаў. Пра гэта паведамілі ў абласным камітэце грамадскага аб’яднання «Беларускі саюз моладзі».

«Ужо другі тыдзень у рэгіёне працуюць дабрачынныя пляцоўкі – «Пункты дабра» па зборы рэчаў першай неабходнасці для людзей, якія прыбываюць з Украіны на тэрыторыю нашай краіны, – расказваюць суразмоўцы. – За гэты час неабыякавыя жыхары Прыдняпроўскага краю прыносілі шампунь, вадкае мыла, зубную пасту, шчоткі, вільготныя сурвэткі, медыцынскія маскі, пральны парашок, аднаразовы посуд, прадукты хуткага прыгатавання і іншае. Усе атрыманыя сродкі ў гэты чацвер будуць перададзены ў БТЧК».

Перадача рэчаў пройдзе 7 красавіка а 14.30 па адрасе вул. Першамайская, 31.

На гэтым «Пункты дабра» не спыняюць сваю працу. Прынесці рэчы першай неабходнасці можна ў будні дзень з 15.00 да 18.00 у камітэты БРСМ, якія ёсць у кожным раёне.

Ред.