У Магілёўскім раёне плануюць запусціць новае абсталяванне па выпуску падгузнікаў для дзяцей і дарослых

У Магілёўскім райвыканкаме прайшла сустрэча кіраўніка раёна Алега Чыкіды і дырэктара ТАА «БелЭмса» Учара Тэйіпа. Яны абмеркавалі пытанні па далейшым супрацоўніцтве і прыцягненні інвестыцый у Магілёўскі раён.

Перагаворы прайшлі з удзелам намесніка старшыні Магілёўскага райвыканкама Ірыны Чындо, першага намесніка і намесніка кіраўніка адміністрацыі Свабоднай эканамічнай зоны «Магілёў» Максіма Туза і Ірыны Давыдзенка.

ТАА «БелЭмса» працуе на тэрыторыі Магілёўскага раёна, з’яўляецца прадпрыемствам-рэзідэнтам свабоднай эканамічнай зоны з турэцкім прыватным капіталам. Прадпрыемства інвестуе сродкі ў вытворчасць запатрабаваных тавараў – дзіцячых і дарослых падгузнікаў, аднаразовых медыцынскіх масак, вільготных гігіенічных сурвэтак і іншых.

У ходзе перагавораў абмяркоўвалася, што прадпрыемства ў хуткім часе плануе пашырэнне вытворчасці і запуск новага абсталявання па выпуску падгузнікаў для дзяцей і дарослых, медыцынскіх пялёнак. Прычым, калі раней гэтыя тавары вырабляліся з сыравіны, якая пастаўляецца з Фінляндыі, ЗША і іншых краін, то цяпер пастаўшчыкамі сталі ў асноўным Расія і Беларусь – імпартазамяшчэнне складае каля 80 %.

Старшыня Магілёўскага райвыканкама Алег Чыкіда зрабіў акцэнт на тым, што Магілёўскі раён з’яўляецца перспектыўным для развіцця бізнесу. Ён запрасіў бізнесменаў прыняць удзел у ІV раённым інвестыцыйным форуме, які ў гэтым годзе пройдзе 12 жніўня. Падчас працы форума плануецца падпісаць узаемавыгадныя дагаворы і кантракты.

СБ