У Магілёве навучэнцаў класа прававой накіраванасці прысвяцілі ў юныя следчыя

У Магілёве вучняў класа прававой накіраванасці СШ № 46 ўрачыста прысвяцілі ў юныя следчыя. Пра гэта паведаміла афіцыйны прадстаўнік УСК па Магілёўскай вобласці Таццяна Старасотнікава.

Клас прававой накіраванасці пад эгідай упраўлення Следчага камітэта па Магілёўскай вобласці функцыянуе ў сярэдняй школе № 46 з пачатку гэтага навучальнага года. Ужо цэлы месяц 25 хлопчыкаў і дзяўчынак з 10 «А» разам з прадметамі школьнай праграмы вывучаюць на факультатывах спецыяльныя дысцыпліны, у тым ліку асновы крымінальнага права, а таксама знаёмяцца з прафесіяй следчага. У межах навучальнага працэсу школьнікі будуць наведваць Следчы камітэт, каб пагутарыць са следчымі і пагрузіцца ў рабочую абстаноўку.

Праз месяц навучання для хлопчыкаў і дзяўчынак профільнага класа адбылося ўрачыстае прысвячэнне ў юныя следчыя. На значнае для іх мерапрыемства былі запрошаны ганаровыя госці – намеснік начальніка ўпраўлення Следчага камітэта па Магілёўскай вобласці Васіль Крывіцкі, начальнік Магілёўскага міжраённага аддзела Следчага камітэта Юрый Юрчанка, а таксама намеснік кіраўніка адміністрацыі Ленінскага раёна Магілёва Яўген Дуплеўскі.

Звяртаючыся да юных магілёўцаў, Васіль Крывіцкі адзначыў, што кожны з іх сур’ёзна і свядома адносіцца да выбару будучай прафесіі: «Вы перасягнулі своеасаблівую мяжу, узялі на сябе адказнасць за свае ўчынкі, прынялі абавязацельства выхоўваць у сабе найлепшыя якасці: весці здаровы лад жыцця, займацца спортам, добра вучыцца. Школьныя гады праляцяць непрыкметна. Перакананы, што атрыманыя веды, энергія і мэтанакіраванасць будуць спрыяць вашаму паспяховаму прафесійнаму станаўленню».

Ён пажадаў дзецям не баяцца перашкод, ісці па жыцці ўпэўнена і смела, захоўваць і памнажаць атрыманыя веды. Гэтыя сказаныя на дарогу словы на адрас хлопцаў падтрымалі ўсе прысутныя.

БЕЛТА