У Магілёве назвалі пераможцаў фестывалю «Моладзь - за Саюзную дзяржаву»

Магілёў прымаў XVIII фестываль «Моладзь - за Саюзную дзяржаву». І ўчора, 7 верасня, на галоўнай сцэне абласнога цэнтру назвалі пераможцаў творчага спаборніцтва.

Фестываль праводзіўся ў дзвюх намінацыях: харэаграфія і вакал. У Магілёве сабраліся творчыя калектывы і выканаўцы з усіх абласцей Беларусі і 20 рэгіёнаў Расіі. На працягу трох дзён яны знаёміліся, размаўлялі, здзіўлялі адзін аднаго сваёй творчасцю, дзяліліся вопытам, насычаліся ўражаннямі і эмоцыямі.

Так, па выніках фестывалю Гран-пры ў намінацыі «Вакал» заваяваў Эдуард Бірукоў з Белгарада. У Беларусь ён прыехаў упершыню і застаўся пад прыемным уражаннем ад прыёму, горада, людзей і фестывалю. У яго няма прафесійнай музычнай адукацыі, але гэта, падкрэслівае ён, ніколі не было перашкодай для самарэалізацыі.

«Тут ты не проста паказваеш сябе, сваю творчасць, а прадстаўляеш свой рэгіён і сваю краіну. Ты разумееш, што дорыш творчасць людзям, абменьваешся карыснымі кантактамі і досведам, - падзяліўся ўражаннямі пераможца. - І гэта вельмі каштоўны досвед, гэта незабыўныя эмоцыі. Вельмі шкада, што ўсё заканчваецца, але я ўпэўнены, што для кожнага ўдзельніка гэта стане кропкай росту, кропкай прарыву ў сваёй кар'еры. Таму што з намі працавала вельмі прафесійная экспертная камісія, якая дала сур'ёзную зваротную сувязь.».

Малады выканавец упэўнены, што павязе з сабой не толькі яркія ўражанні, але і далягляды. Бо ў будучыні з многімі з хлопцаў можна будзе рабіць розныя сумесныя праекты.

Абсалютным пераможцам у намінацыі «Харэаграфія» стаў узорны дзіцячы калектыў «Ансамбль сучаснага і эстраднага танца «Славяначка» з Луганска. Дзеці падзяліліся, што перамога стала для іх нечаканасцю. Быць першымі, канешне ж, хацелася, але і канкурэнцыя была высокай. Песню для пастаноўкі свайго нумара яны выцягнулі на лёсаванні. І як расказала кіраўнік калектыву Арына Аляксандрава, музыка падказала ім, што і як трэба рабіць. І гэтым адрозніваецца гэты фестываль ад іншых. Бо звычайна прывозяць ужо гатовыя нумары, а тут за паўтара дня трэба было паставіць нешта абсалютна новае.

«Гэта вялікі досвед, таму што табе трэба паставіць вокамгненна новую пастаноўку, якая павінна глядзецца якасна, годна, вельмі адкрыта, каб у ёй быў добры пасыл. Таму для нас гэта вялізны крок наперад - як у харэаграфічным, так і ў рэжысёрскім плане. Гэта быў неверагодны досвед», - падзялілася Арына Аляксандрава.

БЕЛТА