У Магілёве ўшанавалі памяць ахвяр фашызму

Штогод у другую нядзелю верасня адзначаецца Міжнародны дзень памяці ахвяр фашызму. У гэты дзень праходзяць памятныя акцыі, людзі ўспамінаюць не толькі салдат, якія аддалі жыццё за Радзіму, але і нявінна забітых.

У Магілёве ля памятнага знака ахвярам генацыду беларускага народа на вуліцы Раўчакова адбылося мерапрыемства, прымеркаванае да Дня памяці ахвяр фашызму. Арганізатарамі выступілі філіял УА «БТЭУПК» «Магілёўскі гандлёвы каледж» і абласная арганізацыя РГА «Патрыёты Беларусі».

Сярод удзельнікаў памятнай акцыі — прадстаўнікі Галоўнага статыстычнага ўпраўлення вобласці, духавенства, абласной арганізацыі РГА «Патрыёты Беларусі», а таксама супрацоўнікі і навучэнцы філіяла УА «БТЭУПК». «Магілёўскі гандлёвы каледж», Магілёўскай дзяржаўнай санаторнай школы-інтэрната для дзяцей, хворых на скаліёз, і сярэдняй школы №21 горада Магілёва. Яны ўшанавалі памяць загінуўшых хвілінай маўчання і ўсклалі кветкі да падножжа манумента.

Месца правядзення мерапрыемства выбрана невыпадкова. У 2024 годзе следчай групай Генеральнай пракуратуры ў рамках расследавання крымінальнай справы аб генацыдзе беларускага народа ў гады Вялікай Айчыннай вайны было знойдзена сем расстрэльных ям, а ў іх астанкі 304 ахвяр, з іх 134 жанчын і адно дзіця.

- Казіміраўскі лес стаў у 1941-1944 гадах адным з самых жудасных месцаў у Магілёве. Тут нямецка-фашысцкія захопнікі па-зверску знішчалі мірных жыхароў, яўрэяў, падпольшчыкаў, партызан, псіхічнахворых людзей. Расстрэльвалі, прывозілі ў душагубках, узрывалі, закопвалі, - распавяла кіраўніца ваенна-патрыятычнага выхавання філіяла УА «БТЭУПК» «Магілёўскі гандлёвы каледж» Вольга Рудакоўская.

Як адзначыў старшыня Магілёўскай абласной арганізацыі РГА «Патрыёты Беларусі» Аляксандр Шкадаў, святая місія старэйшага пакалення - перадаць моладзі і будучым пакаленням памяць аб Вялікай Айчыннай вайне, расказаць праўдзівую гісторыю аб ваенных падзеях.

- Вайна - гэта вялікае зло, якое пакінула шнары на лёсах мільёнаў. І наш абавязак - зрабіць усё магчымае, каб такая трагедыя ніколі больш не паўтарылася, - дадаў ён.

 mogilevnews.by