У Магілёве ўшаноўвалі пераможцаў абласнога тура XVII Рэспубліканскага фестывалю «Не старэюць душой ветэраны»

У Магілёве ўшаноўвалі пераможцаў абласнога тура XVII Рэспубліканскага фестывалю народнай творчасці ветэранскіх калектываў «Не старэюць душой ветэраны». На фінальнае мерапрыемства прыехалі больш за дзвесце ўдзельнікаў з розных рэгіёнаў Прыдняпроўскага краю. Яны прадэманстравалі свае таленты падчас гала-канцэрта, а таксама на выставе работ дэкаратыўна-прыкладнога і выяўленчага мастацтва.

Публіку і пераможцаў фестывалю прывітаў дырэктар установы культуры Магілёўскага абласнога метадычнага цэнтра народнай творчасці і культурна-асветнай працы Алег Хмялькоў:

- Самыя лепшыя з вас са сваімі творчымі нумарамі паедуць у Мінск. Прыемна, што ўзровень удзельнікаў з кожным годам расце. Фестываль для тых, хто насамрэч не старэе душой і хоча дэманстраваць сваю творчасць. Ён праводзіцца для розных катэгорый. І гэта не толькі людзі творчыя, але і людзі працы, якія ў свой час былі заўважаны на вытворчасці, у нас на сцэне. Мы падтрымліваем кожнага з іх. Лічу, што такі фестываль вельмі важны, найперш для яго ўдзельнікаў.

Кіраўнік народнага клуба ветэранаў «Дабрыня» з Краснапольскага раёна Ларыса Вараб'ёва не хавае захаплення ад фестывалю і запэўнівае, што песня ім дапамагае жыць, служыць эліксірам маладосці:

– Спяваем народныя песні, але ёсць у нас і аўтарскія. Сярэдні ўзрост удзельнікаў народнага клуба ад 60 гадоў і старэйшыя. Самая ўзроставая наша пявучая размяняла дзевяты дзясятак, але з задавальненнем выступае разам з намі. Любім спяваць і з радасцю нясем сваю творчасць любімым гледачам.

Вядучы метадыст аддзела традыцыйнай мастацкай культуры Магілёўскага абласнога метадычнага цэнтра народнай творчасці і культурна-асветніцкай работы, народны майстар Наталля Даменікава адзначыла, што кожны раз, калі праходзіць такі фестываль, яны бачаць новых таленавітых майстроў і новыя работы.

Пераможцаў вызначылі ў 9 намінацыях. Дыпломамі адзначаны дуэты, вакальна-харавыя і харэаграфічныя калектывы, ансамблі і сольныя выканаўцы, майстры дэкаратыўна-прыкладнога і выяўленчага мастацтва. Сярод тых, хто ўдастоены дыпломаў першай ступені, - салістка ансамбля народнай песні «Спадчына» Пачапоўскага сельскага Дома культуры з Краснапольскага раёна Ніна Яцутка, удзельнік клуба аматараў шансона «Душа ў песні» Віктар Чынны з Чэрыкаўскага раёна, удзельнік эстраднай групы «Ветразь» Крычаўскага раёну. цэнтра культуры Міхаіл Ляшчоў, народны жаночы вакальны ансамбль «Задорніцы» Клімавіцкага раённага цэнтра культуры.

Лепшыя творчыя калектывы і індывідуальныя выканаўцы прымуць удзел у заключных мерапрыемствах XVII Рэспубліканскага фестывалю народнай творчасці ветэранскіх калектываў «Не старэюць душой ветэраны» ў Мінску.

СБ