У продаж паступілі квіткі на канцэрты свята «Александрыя збірае сяброў» у Шклоўскім раёне

У продаж паступілі квіткі на канцэрты традыцыйнага свята «Купалле» («Александрыя збірае сяброў»), які пройдзе 6-7 ліпеня ў аграгарадку Александрыя Шклоўскага раёна.

Квіток на гала-канцэрт «Зроблена ў Беларусі» абыдзецца ў Br 29–Br 31,5. У аснову канцэпцыі высокатэхналагічнага нацыянальнага шоу ляжа альбом «Куточак Беларусі» лаўрэатаў прэміі «За духоўнае адраджэнне» Юліі Быкавай і Яўгена Алейніка. Плануецца, што, акрамя гэтых артыстаў, на сцэне 6 ліпеня выступяць выступяць айчынныя і замежныя выканаўцы: народны артыст Расіі Леў Лешчанка, народная артыстка Украіны Ціна Караль, народны артыст Беларусі Анатоль Ярмоленка, заслужаныя артысты Беларусі Аляксандр Саладуха, Іна Афанасьева, Алёна Ланская, Вікторыя Алешка, Іскуі Абалян, Руслан Аляхно, гурт «Дразды», маладыя таленты краіны – Вольга Сацюк, Аlen Hit, Руслан Асланаў, Марыя Магільная, заслужаны калектыў Беларусі Дзяржаўны акадэмічны ансамбль танца Беларусі, балет Вольгі Шамровай, танцавальны праект «М.Y.D.C.» Юліі і Мікалая Міхайлавых. Пачатак – 21.30.

Дарэчы, пасля гала-канцэрта адпачывальнікаў запросяць на бясплатную начную дыскатэку. У праграме – выступленне артыстаў беларускай эстрады і Магілёўскай абласной філармоніі, групы «Лепрыконсы», вядучых дыджэяў Беларусі. Завершыцца гулянне святочным феерверкам.

7 ліпеня ў 14.00 пачнецца канцэрт народнага артыста Беларусі Анатоля Ярмоленкі і заслужанага калектыву Беларусі «Сябры». Кошт квітка – Br 10–Br 12,5.

Набыць квіткі можна ў касах філармоніі і на сайце kvitki.by. Дадатковую інфармацыю можна атрымаць па тэлефонах у Магілёве: 8 (0222) 75-96-92, 75-97-69.