У СВК «Гігант» Бабруйскага раёна ўшаноўвалі работнікаў, занятых на вясенне-палявых работах.

У аграгарадку Вялікія Бортнікі Бабруйскага раёна, цэнтральнай сядзібе СВК «Гігант», прайшло свята для работнікаў сельгаспрадпрыемства. Ушаноўваць людзей, якія былі занятыя на вясновай сяўбе, у гаспадарцы стала традыцыяй. Вынікі вяснова-палявых работ, лічаць у «Гіганце», не менш важныя, чым вынікі жніва.

На свята сабраліся працаўнікі сельгаспрадпрыемства, іх сем'і і аднавяскоўцы. Віншавалі гігантаўцаў старшыня райсавета дэпутатаў Ірына Старавойтава, намеснік начальніка райсельгасхарчу Аляксандр Каўранін. Старшыня СВК «Гігант» Васіль Жук, падводзячы вынікі вясенняй кампаніі, падкрэсліў, што ў аснове любой паспяховай справы заўсёды стаяць людзі:

- Вынікі вясновай працы бачныя і актуальныя толькі па сканчэнні часу - праз паўтара-два месяцы. Таму мы і падводзім вынікі зараз. Гаворым дзякуй тым людзям, якія актыўна папрацавалі на гэтым этапе. Бачым па палях, што ўраджай будзе: усё пасеянае ўжо ўзышло, кусціцца, нішто не стрымлівае расліны. Спадзяемся атрымаць ураджай не горш за леташні. У гэты дзень віншавалі людзей, якія былі задзейнічаны на палявых работах. Механізатар Святаслаў Зуб, да прыкладу, зачыніў усю яравую сяўбу. Тры чалавекі былі на арганіцы, адзначылі і тых, каго задзейнічалі на пасадцы бульбы. У гэтым годзе, дарэчы, на сцэну паднімаліся і маладыя механізатары. Яны спаборнічалі, гэта разбудзіла ў іх спартовую рызыку. Разумелі, што важна якасна адсеяцца, а таксама трымаць тэмп. Моладзь бачыла, што апроч заработнай платы ёсць і спаборніцтва, якое дае магчымасць атрымаць яшчэ больш. Па ўсходах вызначылі, што з задачай хлопцы справіліся якасна!

У ліку перадавікоў - Святаслаў Зуб. У сельгаспрадпрыемстве механізатар працуе ўжо трыццаць гадоў:

- Сеяў збожжавую групу, рапс, гарох, ячмень. Аб'ёмы вялікія - 1114 гектараў. Складана, але зладзіўся. Зачыніў усё на адным пасяўным агрэгаце - 12-метровай сеялцы. Гэта дало магчымасць не прыцягваць дадаткова людзей, а за кошт энерганасычанай тэхнікі завяршыць работу ў сціслыя агратэхнічныя тэрміны і зэканоміць паліва.

Лепшыя работнікі былі адзначаны дыпломамі і падзякамі, грашовымі прэміямі і кветкамі. Каштоўнымі падарункамі таксама былі ўзнагароджаны сем'і, якія выхоўваюць траіх і больш дзяцей, бацькі якіх працуюць у СВК. Дапоўніў праграму святочны канцэрт.

СБ