Удзельнікі зімовай абласной спартакіяды работнікаў ЖКГ разыгралі 14 камплектаў узнагарод

Больш за 300 удзельнікаў, якія прадстаўлялі 24 каманды працоўных калектываў прадпрыемстваў жыллёва-камунальнай гаспадаркі, прынялі ўдзел у XIV зімовай спартакіядзе Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў.

Ва ўрачыстай цырымоніі адкрыцця спартыўнай падзеі, якая прайшла на базе спарткомплексу Магілёўскага дзяржаўнага ўніверсітэта харчавання, прыняла ўдзел намеснік старшыні абласнога аб’яднання прафсаюзаў Таццяна Марачкава.

Падчас спаборніцтваў іх удзельнікі вызначылі наймацнейшых у настольным тэнісе, стральбе з пнеўматычнай вінтоўкі, шашках, шахматах, дартсе, більярдзе, плаванні.

Паводле слоў старшыні абласной арганізацыі галіновага прафсаюза Паўла Жуйкова, падобныя спаборніцтвы спрыяюць згуртаванню калектываў.

«Правядзенне такіх спаборніцтваў не толькі служыць справе папулярызацыі заняткаў фізічнай культурай і спортам, прапагандзе здаровага ладу жыцця сярод работнікаў, але і спрыяе ўмацаванню адзінства членаў прафсаюза, згуртаванасці працоўных калектываў, што, безумоўна, станоўча адбіваецца на выніках працы», – адзначыў Павел Жуйкоў.

Па выніках ўпартай спартыўнай барацьбы пераможцамі спартакіяды прызнаныя:

ІІІ месца – Бабруйскае УКД дарожна-эксплуатацыйнае прадпрыемства;

ІІ месца – філіял «Бабруйскі водаканал» УВКП ВКГ «Магілёўаблводаканал»;

І месца – філіял «Магілёўскі водаканал» УВКП ВКГ «Магілёўаблводаканал».

У дзясятку наймацнейшых увайшлі каманды Клімавіцкага «Камунальніка», магілёўскага прадпрыемства цеплаэнергетыкі, ЖРЭУ Ленінскага і Кастрычніцкага раёнаў г. Магілёва, Бабруйскага прадпрыемства цеплаэнергетыкі, магілёўскія дарожна-маставое прадпрыемства і спецыялізаванае аўтапрадпрыемства.