Урачыстае адкрыццё выставы, прысвечанай 110-годдзю з дня нараджэння Паўла Масленікава, адбудзецца 14 лютага

Урачыстае адкрыццё выставы «Пакаленні», прысвечанай 110-годдзю з дня нараджэння Паўла Васільевіча Масленікава, адбудзецца 14 лютага ў музеі імя знакамітага мастака. Пра гэта паведамілі ва ўстанове культуры.

У экспазіцыі можна будзе азнаёміцца з творамі Паўла Васільевіча, якія не выстаўлены ў галерэі, а таксама з работамі яго сына, унука і вучняў. Наведвальнікам будзе ўнікальная магчымасць убачыць тэатральныя дэкарацыі, асабістыя рэчы, фатаграфіі і ўзнагароды Народнага мастака Беларусі.

Як расказалі супрацоўнікі музея, выстава размесціцца ў 5 залах анфілады 2 паверха музея. Усяго экспануецца больш за 100 работ - жывапіс, графіка, кераміка. У аснове сюжэтаў твораў - пейзажы Магілёўшчыны і Беларусі, партрэты.

«Творчасць Паўла Васільевіча Масленікава вылучаецца рамантычным настроем, рэалістычным адлюстраваннем прыроды, - падзяліліся суразмоўцы. - У яго пейзажах прысутнічае ўся жанравая разнастайнасць: гарадскія, архітэктурныя, марскія, індустрыяльныя, гістарычныя, але больш за ўсё ў іх адлюстраваны зямныя ландшафты. У сваіх работах мастак узнаўляе блізкую сэрцу родную прыроду. Толькі свой асаблівы свет, дзе рэальнасць пераплятаецца з паэзіяй, жывапіс мастака напаўняецца музычнасцю, экспрэсія набліжаецца да тэатралізацыі».

У гэты ж дзень адбудзецца ўскладанне кветак ля падножжа помніка-бюста Паўла Масленікава, а таксама круглы стол з удзелам сваякоў і прыхільнікаў тэатральнага жывапісца, майстра пейзажа, мастацтвазнаўцы, педагога, заслужанага дзеяча мастацтваў БССР, народнага мастака Беларусі.

Дарэчы, выстава працягне сваю працу да 29 лютага.

Галіна Гаўрыловіч