Выбраны старшыня Магілёўскага абласнога аддзялення Беларускай партыі «Белая Русь»

Канферэнцыя абласнога аддзялення Беларускай партыі «Белая Русь» адбылася сёння ў Магілёўскім аблвыканкаме пры ўдзеле старшыні партыі Алега Раманава. У яе рабоце прынялі ўдзел 134 дэлегаты, прадстаўнікі органаў выканаўчай улады, сродкаў масавай інфармацыі, грамадскіх аб'яднанняў вобласці.

У сярэдзіне ліпеня завяршылася рэгістрацыя 25 раённых аддзяленняў партыі Магілёўскай вобласці, наступны этап - пабудова абласнога аддзялення. На парадак дня было вынесена пяць пытанняў. Асноўныя з іх - па стварэнні абласнога аддзялення партыі і абранні старшыні. Пры падтрымцы большасці галасоў ім стаў старшыня Магілёўскага гарадскога Савета дэпутатаў Максім Гурын.

Максім Гурын падзякаваў за аказаны яму высокі давер: «Выдатна разумею ўсю ступень адказнасці за давераны ўчастак працы. Вядома, усе разам, адзінай камандай мы працягнем справу партыі «Белая Русь», будзем працаваць на карысць нашай краіны. Працягнем працаваць з рэгіянальнымі прадстаўніцтвамі. У камандзе аднадумцаў, я перакананы, мы забяспечым рэалізацыю намечаных планаў і статутных мэт нашай партыі. Што, несумненна, будзе садзейнічаць забеспячэнню стабільнасці нашага Прыдняпроўскага краю і краіны ў цэлым, а таксама абароненасці нашага народа. І мы будзем гарантам стабільнасці, надзейнай апорай нашай дзяржаве і Прэзідэнту Аляксандру Рыгоравічу Лукашэнку. Перакананы, што кожны член партыі разумее задачы, якія стаяць перад ім, і ўсведамляе асабістую адказнасць перад людзьмі і нашай краінай».

Алег Раманаў павіншаваў лідэра абласнога аддзялення Беларускай партыі «Белая Русь» з абраннем і ўручыў яму партыйны білет. Таксама партыйныя білеты ў гэты дзень былі ўручаны членам вышэйшай палітрады. Акрамя таго, партыйныя білеты і пасведчанні аб рэгістрацыі атрымалі кіраўнікі раённых аддзяленняў.

«Сёння перад дэлегатамі стаяла задача вырашыць шэраг значных пытанняў: стварыць Магілёўскае абласное аддзяленне партыі, абраць яго кіраўніка, сфарміраваць Савет Магілёўскага аддзялення. Гэта неабходна для таго, каб рэгіянальныя аддзяленні партыі хутка адгукаліся на патрэбы нашых партыйцаў, працавалі са сваімі людзьмі ў рэгіёнах. Каб партыя была не верхавіннай структурай, а сілай, укаранёнай у грамадскім жыцці нашай краіны, ва ўсіх яе рэгіёнах. Сёння мы закладваем для гэтага аснову і ў далейшым развіццё партыі будзе дынамічным і шматмерным», - распавёў ён.

У бліжэйшы час, як адзначыў Алег Раманаў, праца будзе накіравана на фармаванне кадравага рэзерву, вылучэнне сябраў партыі ў кандыдаты ў дэпутаты ўсіх узроўняў: «Мы будзем працаваць над тым, каб умацоўваць свае сувязі з партыямі іншых краін і тым самым фармаваць партыйныя саюзы для адстойвання. інтарэсаў Рэспублікі Беларусь на міжнароднай арэне. Гэтыя і многія іншыя задачы сёння стаяць у прыярытэце нашай дзейнасці і мы будзем паспяхова іх вырашаць», - падкрэсліў ён.

Адказваючы на пытанні журналістаў, Алег Раманаў звярнуў увагу, што членам партыі можа быць любы грамадзянін краіны, які дасягнуў 18 гадоў, за выключэннем некаторых катэгорый грамадзян, якія вызначаны ў Канстытуцыі: «Калі казаць пра тое, які гэта чалавек, то, канешне ж, чакаем у нашых шэрагах патрыётаў Беларусі, людзей, якія падзяляюць статут і праграму нашай партыі. Якія шчыра зацікаўлены ў росквіце нашай краіны, у яе паспяховым, паступальным развіцці. Важна адзначыць, што член партыі - гэта чалавек, які павінен быць актыўным, уключацца ў дзейнасць, бо важна не толькі быць членам партыі і мець членскі білет, важна праяўляць актыўнасць на сваім працоўным месцы і ў грамадскім жыцці, рэалізоўваць мэты, каштоўнасці і сэнсы партыйнай працы».

Юлія Таранава, фота Галіны Гаўрыловіч