Выдача сертыфікатаў ЦТ пачнецца ў Беларусі з 24 ліпеня

Выдача сертыфікатаў ЦТ пачнецца ў Беларусі з 24 ліпеня, паведаміў дырэктар Рэспубліканскага інстытута кантролю ведаў Юрый Міксюк газеце «СБ. Беларусь сегодня».

«Выдаваць сертыфікаты мы пачнём з 24 ліпеня, а па рэзервовых днях - з 29 ліпеня. Абітурыенты паспеюць падаць дакументы для ўдзелу ў конкурсах у ВНУ і каледжы», - сказаў Юрый Міксюк.

Уступная кампанія ў гэтым годзе мае некаторыя асаблівасці, выкліканыя эпідсітуацыяй. Калі гаварыць пра арганізацыю цэнтралізаванага тэсціравання, то тут дырэктар РІКВ спыніўся на некалькіх момантах. «Мы пастараліся ў час запісу на ЦТ, які прайшоў з 2 мая па 1 чэрвеня, стварыць для абітурыентаў максімальна камфортныя і бяспечныя ўмовы. Арганізавалі запіс у выглядзе двух этапаў: першы з'яўляецца дыстанцыйным, калі абітурыент запаўняе прадастаўлены яму на сайце РІКВ электронны бланк заявы і адпраўляе ў той пункт тэсціравання, які лічыць зручным для сябе. Нагадваю, абітурыент мае магчымасць зарэгістравацца ў любым пункце для праходжання ЦТ, прычым неабавязкова нават у тым, з якім вядзе перапіску. Пасля таго як заява адпраўлена, яна разглядаецца пунктам рэгістрацыі, і на адрас абітурыента прыходзіць рахунак, па якім трэба аплаціць рэгістрацыю дакументаў на ЦТ. І альбо адразу ж прыходзіць прапанова, калі лепш прыйсці ў пункт рэгістрацыі, альбо паступаючы можа скарыстацца паслугай выбару зручнага для сябе часу і даты наведвання», - расказаў ён.

Юрый Міксюк падкрэсліў: структура тэстаў і іх складанасць не змяняюцца. Ён нагадаў, што тэсціраванне ў гэтым годзе пачнецца з 25 чэрвеня. Каб стварыць максімальна камфортныя і бяспечныя ўмовы для абітурыентаў, масавыя прадметы, руская мова і матэматыка, будуць здавацца ў два дні. «Звярніце ўвагу: тыя, хто атрымаў пропускі да таго, як было прынята рашэнне аб пераносе тэрмінаў правядзення цэнтралiзаванага тэсцiравання, павінны кіравацца табліцай адпаведнасці дат, якая ёсць на сайце РІКВ і Мінадукацыі. Напрыклад, руская мова з 15 чэрвеня пераносіцца на 26-га. Пры гэтым мяняць пропуск не трэба. Тыя ж, хто атрымаў пропускі пазней, здадуць гэты прадмет 27 чэрвеня, - адзначыў ён. - Хачу падкрэсліць, што сам абітурыент па рускай мове і матэматыцы не можа выбраць адзін з двух дзён: колькасць аўдыторый абмежавана, створаны пэўныя камісіі, строга пад лік падвозяцца фельд'егерскай службай бланкі заданняў і адказаў. Акрамя таго, ідзе папярэдняя жараб'ёўка абітурыентаў па аўдыторыях, таму не ў свой дзень паступаючы не трапіць на тэсціраванне. Усё зроблена, каб стварыць спрыяльныя ўмовы для наведвання пункта тэсціравання, а ў час самога іспыту забяспечыць рассадку ва аўдыторыях на бяспечнай дыстанцыі, зыходзячы з патрабаванняў, якія выстаўляе Міністэрства аховы здароўя».

Дырэктар РІКВ запэўніў: зацверджаны графік цэнтралізаванага тэсціравання дазваляе ў крыху больш сціслыя тэрміны, але рэалізаваць усе ўмовы інфармацыйнай бяспекі і надзейнасці, каб бланкі адказаў прайшлі неабходную верыфікацыю. «Застаецца і патрабаванне, каб тэсты былі правераны на працягу 10 рабочых дзён», - дадаў ён.

БЕЛТА