16.05.2024 - 11:57
Выпускніца Касцюковіцкай дзіцяча-юнацкай спартыўнай школы, выхаванка трэнера-выкладчыка Аляксандра Герашчанка прыняла ўдзел у спаборніцтвах высокага ўзроўню і ўзнялася на трэцюю прыступку пастамента. Паліна Бурачкова ўслед за сваёй зямлячкай Анфісай Капаевай вызначылася ў сербскім горадзе Нові-Садзе, дзе праходзілі чэмпіянат Еўропы і маладзёжнае першынство Еўропы па самба.
 
У кантынентальных турнірах па самба прынялі ўдзел больш за 500 спартсменаў з 29 краін. Спаборніцтвы адбыліся ў 56 вагавых катэгорыях. Упершыню ў рамках чэмпіянату Еўропы прайшлі спаборніцтвы па жаночым баявым самба.

Паліна прыняла ўдзел у маладзёжным першынстве Еўропы па самба і ў вагавой катэгорыі 54 кг заваявала бронзавы медаль.

- Добрае выступленне, - пракаментаваў першы трэнер Паліны Аляксандр Герашчанка. - Лепшае, вядома, наперадзе.

Усяго беларусы заваявалі шэсць бронзавых узнагарод на маладзёжным першынстве Еўропы па самба.

golk.by