Якая адказнасць пагражае парушальнікам масачнага рэжыму

У Беларусі з 9 кастрычніка для ўсіх грамадзян стала абавязковым нашэнне масак і захаванне дыстанцыі ў грамадскіх месцах: магазінах, аб’ектах грамадскага харчавання, бытавога абслугоўвання, тэатрах, кінатэатрах, стадыёнах, прадпрыемствах, установах аховы здароўя, аптэках і іншых аб’ектах. Ці змогуць прыцягнуць парушальнікаў санітарна-эпідэміялагічных патрабаванняў да адміністрацыйнай адказнасці, расказала намесніца міністра юстыцыі Наталля Філіпава.

– Цяпер усе гавораць аб неабходнасці захавання санітарных нормаў і правілаў у сувязі з распаўсюджваннем каранавіруснай інфекцыі. Што павінны ведаць пра іх нашы грамадзяне?

– Санітарныя нормы і правілы ўстанаўліваюць патрабаванні да арганізацыі і правядзення санітарна-супрацьэпідэмічных мерапрыемстваў, накіраваных на прадухіленне заносу, узнікнення і распаўсюджвання грыпу і інфекцыі COVID-19, і з’яўляюцца абавязковымі для выканання дзяржаўнымі органамі, іншымі арганізацыямі, фізічнымі асобамі, у тым ліку індывідуальнымі прадпрымальнікамі.

– Ці прадугледжана адміністрацыйная адказнасць за парушэнне санітарна-эпідэміялагічных патрабаванняў?

– Так, арт. 17.5 Кодэкса Беларусі аб адміністрацыйных правапарушэннях прадугледжана адміністрацыйная адказнасць як фізічных, так і юрыдычных асоб за парушэнне санітарна-эпідэміялагічных патрабаванняў, у тым ліку санітарных нормаў і правілаў. Санкцыя гэтага артыкула прадугледжвае накладанне штрафу: на фізічных асоб – у памеры да 30 базавых велічынь, на індывідуальнага прадпрымальніка – да 200 базавых велічынь, а на юрыдычную асобу – да 500 базавых велічынь.

– Чым абумоўлены і на што накіраваны апошнія змены, унесеныя ў санітарныя нормы і правілы?

– У сітуацыі складанай санітарна-эпідэміялагічнай абстаноўкі Міністэрствам аховы здароўя было прынята рашэнне аб увядзенні дадатковых мер, накіраваных на прадухіленне распаўсюджвання інфекцыі COVID-19.

Разам з абавязкам кіраўнікоў суб’ектаў гаспадарання па забеспячэнні кантролю за выкарыстаннем сродкаў абароны органаў дыхання і захаваннем сацыяльнай дыстанцыі (1–1,5 м) у месцах масавага збору людзей (транспарт, гандлёвыя аб’екты, арганізацыі аховы здароўя і г.д.) работнікамі і фізічнымі асобамі пры наведванні такіх аб’ектаў, дадаткова замацаваны абавязак фізічных асоб па выкарыстанні масак і выкананні сацыяльнай дыстанцыі. Гэтыя змены ўступілі ў сілу з 9 кастрычніка 2021 года. Адначасова зроблены акцэнт на правільным выкарыстанні сродкаў абароны органаў дыхання – яны павінны забяспечваць закрыццё рота, носа і падбародка.

– Дык якія сёння падставы для прыцягнення да адказнасці нашых грамадзян?

– Як ужо было адзначана, дзеючая рэдакцыя арт. 17.5 КаАП прадугледжвае магчымасць прыцягнення грамадзян да адміністрацыйнай адказнасці за парушэнне санітарных нормаў і правілаў. Ужыванне названага артыкула КаАП абумоўлена аб’ёмам патрабаванняў, якія змяшчаюцца ў санітарных нормах і правілах.

Такім чынам, невыкананне грамадзянамі абавязкаў па выкарыстанні масак і захаванні сацыяльнай дыстанцыі дазваляе прымяніць да парушальнікаў масачнага рэжыму меры адміністрацыйнай адказнасці па артыкуле 17.5 КаАП.

БЕЛТА