Яўген Залатой па вяртанні з Парыжа: на Гульнях я быў адзін, але за спіной стаяла велізарная сям'я

Беларускі весляр Яўген Залатой падзяліўся першымі адчуваннямі пасля вяртання з Парыжа, дзе ён заваяваў срэбра летніх Алімпійскіх гульняў у акадэмічным веславанні.

«Мы трэніравалі і фінішны спурт, і стартавую тактыку. Усё, што вы ўбачылі ў заездзе, было запланавана, я не перажываў. Сапернікі павялі гонку няправільна, у пачатку яны паехалі за лідэрам, а ў канцы ім не хапіла сіл. Гэтым я і скарыстаўся. Аўтобус, у якім я ехаў на канал перад фіналам, зламаўся, але хвалявання не было. У нас быў кантакт прадстаўніка МАК, і мы адразу патэлефанавалі яму. Ён тут жа сказаў, што гонку перанясуць, і гэта таксама стала своеасаблівай перавагай. Я ж даведаўся пра гэта першым, а сапернікі не ведалі і ўжо пачалі размінку, ім было нязручна», - адзначыў Яўген Залатой.

Першы прызёр Алімпіяд у мужчынскім акадэмічным веславанні ў суверэннай гісторыі Беларусі дадаў, што яшчэ не да канца ўсвядоміў значнасць свайго дасягнення. «Думаю, што гэты медаль надасць упэўненасці маладому пакаленню, многія хлопцы пісалі і дзякавалі за тое, што паказаў ім гэтую магчымасць. Адчуваю вялікі гонар, усё атрымалася дзякуючы камандзе. Заўтра павінен забраць жонку і сына з радзільнага дома, у мяне падвойная ўзнагарода. Цяпер я проста шчаслівы вярнуцца дадому і ўбачыць сяброў. У Парыжы я быў адзін, але ведаў, што за плячыма вялізная сям'я, цэлая краіна».

У Нацыянальным аэрапорце Мінск Залатога і яго калегу па зборнай Таццяну Клімовіч сустрэлі сябры, прадстаўнікі НАК Беларусі і Міністэрства спорту і турызму, а таксама супрацоўнікі Рэспубліканскага цэнтра алімпійскай падрыхтоўкі па вяслярных відах спорту і Беларускай федэрацыі веславання.

БЕЛТА