Запальваннем агнёў на галоўнай ёлцы Магілёўскай вобласці дадзены старт навагоднім святам і акцыі «Нашы дзеці»

Святочная цырымонія запальвання агнёў на галоўнай ёлцы Магілёўшчыны адбылася 15 снежня ў абласным цэнтры пры ўдзеле старшыні аблвыканкама Анатоля Ісачанкі. Такім чынам у рэгіёне афіцыйна пакладзены пачатак традыцыйнай дабрачыннай акцыі «Нашы дзеці» і навагоднім гулянням у горадзе на Дняпры.

«Сёння стартуе навагодняя дабрачынная акцыя «Нашы дзеці», якая праходзіць ужо на працягу многіх гадоў. Гэта заўсёды станоўчыя эмоцыі. Гэта свята, – адзначыў перад пачаткам імпрэзы Анатоль Ісачанка. – Дзеці з нецярпеннем чакаюць Дзеда Мароза і Снягурку, шчыра вераць у казку. І задача нас, дарослых, – зрабіць так, каб для іх гэта свята адбылося.

Год заканчваецца. Мы падводзім яго вынікі, глядзім у будучыню, віншуем адзін аднаго, радуемся. Разам з дзецьмі сёння запальваем агні на ёлцы».

У сваім віншаванні да дзяцей губернатар падкрэсліў: «Вам, дарагія дзеці, пашанцавала нарадзіцца і жыць у нашай цудоўнай Беларусі. У вас і вашых аднагодкаў ёсць усе магчымасці атрымаць добрую адукацыю, займацца творчасцю, спортам, развіваць свае таленты.

У нас мірная і спакойная краіна. Краіна, у якой кожны з вас можа дасягнуць многага. Трэба толькі старанна вучыцца, слухаць старэйшых, любіць сваіх блізкіх, сваю Радзіму, і тады ўсе вашы добрыя мары абавязкова спраўдзяцца.

Мне вельмі хочацца, каб вы жылі дружна і шчасліва, з аптымізмам глядзелі ў будучыню, верылі ў сябе і свае сілы.

Навагоднія і калядныя святы – гэта час, калі нам усім больш чым звычайна хочацца цудаў, хочацца рабіць дабро. І я ўпэўнены, што ні адзін дарослы не застанецца ўбаку, прыме самы актыўны ўдзел у акцыі «Нашы дзеці». І свята прыйдзе да кожнага дзіцяці, у кожную сям’ю. Падарункі атрымаюць усе. Асабліва ім рады тыя дзеці, якія ў сілу розных абставінаў маюць патрэбу ў дадатковым клопаце, падтрымцы і ўвазе».

Анатоль Ісачанка пажадаў усім моцнага здароўя, выканання жаданняў, міру і дабрабыту, цяпла і ўтульнасці побач з роднымі і блізкімі.

Самай чаканай часткай свята стала запальванне ілюмінацыі: сёлета зборную канструкцыю з жывых ялінак змяніла штучная 38-метровая ёлка, упрыгожаная піксельнай гірляндай з 3D эфектам. Асаблівую навагоднюю атмасферу ў гэты вечар на плошчы Леніна магілёўцам і гасцям горада таксама задавалі творчыя калектывы абласнога цэнтра і зоркі беларускай эстрады, роставыя лялькі і больш за сотню Дзядоў Марозаў са Снягуркамі, арыгінальныя фотазоны. Мюзікл «Таямніцы магутнага льва», танцавальны флэшмоб сталі яркімі падарункамі для гасцей свята.

З гэтага дня таксама заззяюць агнямі ўсе навагоднія прыгажуні ў раённых цэнтрах і будзе ўключана святочная ілюмінацыя.

Юлія Таранава, фота Галіны Гаўрыловіч