Зарплата, умовы працы і адпачынку, інфраструктура: старшыня райвыканкама аб замацоўванасці кадраў

Годныя заработная плата, умовы працы і адпачынку, развітая і даступная інфраструктура населеных пунктаў - старшыня Магілёўскага райвыканкама Дзмітрый Мудрагелаў падчас сустрэчы з маладымі спецыялістамі расказаў аб тым, што дапамагае ў замацаванні кадраў на месцах.

Тэматычная сустрэча кіраўніцтва раёна з моладдзю прайшла сёння ў Магілёўскім дзяржаўным агралесатэхнічным каледжы ў Буйнічах. Яе ўдзельнікамі сталі больш за 150 маладых спецыялістаў, якія сёлета прыйшлі на свае першыя працоўныя месцы.

«Мы праводзім працу з маладымі спецыялістамі, пачынаючы ад лакальных сустрэч у асобных арганізацыях рознага напрамку дзейнасці і заканчваючы такімі сустрэчамі, якія ахопліваюць усіх маладых спецыялістаў раёна. Сёння мы бачым, чым жыве нашая моладзь. Таму стараемся ствараць усе ўмовы, каб яны не проста прыходзілі ў арганізацыі на адпрацоўку, а каб замацоўваліся і адчувалі сябе там камфортна», - адзначыў Дзмітрый Мудрагелаў.

Ён таксама пералічыў, што робяць раённыя прадпрыемствы і арганізацыі для таго, каб дапамагчы маладым спецыялістам зрабіць свае першыя крокі ў дарослым жыцці і прафесійнай сферы. «Вядома ж, гэта арэнднае жыллё. Калі няма арэнднага жылля, некаторыя арганізацыі дапамагаюць у аплаце здымнага жылля. Гэта і так званыя пад'ёмныя. Можа быць, сумы і не такія вялікія, але гэта добрая дапамога для станаўлення маладога чалавека ці дзяўчыны, - пералічыў ён. - Я заўсёды накіроўваю нашых кіраўнікоў, што вельмі важную ролю ў замацоўванасці кадраў іграе клімат, створаны ў калектыве. Трэба рабіць так, каб маладых адмыслоўцаў прымалі, як у сям'ю. Гэта трэба для таго, каб яны не адчувалі сябе некамфортна. Зразумела, сур'ёзную ролю іграе і настаўніцтва».

Стварэнне камфортных умоў для жыцця - яшчэ адно важнае пытанне, якое наўпрост уплывае на тое, ці застанецца малады спецыяліст працаваць далей. «І гэтая праца праводзіцца ўвесь час, і асабліва ў Год добраўпарадкавання. Абсталяванне дзіцячых і спартыўных пляцовак - работа, якая прадаўжаецца ў населеных пунктах раёна. Для маладых сем'яў адкрылі сучасны дзіцячы садок у аграгарадку Палыкавічы, - адзначыў ён. - Мы робім упор на тое, каб уся сацыяльная інфраструктура і месцы адпачынку былі максімальна развітымі. Вядзем добраўпарадкаванне месцаў адпачынку, паркавых зон, каб можна было выйсці з дзецьмі, самім увечар правесці час на свежым паветры. Усё гэта дапамагае ў замацаванні моладзі ў сельскіх населеных пунктах».

БЕЛТА