Жыхарам Магілёўскай вобласці 22 верасня прапануюць далучыцца да міжнароднай акцыі «Дзень без аўтамабіля»

Жыхарам Магілёўшчыны прапануюць далучыцца да міжнароднай акцыі «Дзень без аўтамабіля». У аўторак 22 верасня абласны камітэт прыродных рэсурсаў і аховы навакольнага асяроддзя заклікае насельніцтва рэгіёна пакінуць аўтамабілі на стаянках і перасесці на грамадскі транспарт або веласіпед.

Сёння ўявіць сабе сучасны свет без аўтамабіляў немагчыма. Безумоўна, усе мы любім камфорт, а машына дорыць нам яго штодня. Акрамя таго, яна даўно стала прыкметай пэўнага статусу яе ўладальніка. Але ў мітусні штодзённых клопатаў мы не задумваемся пра тое, якую шкоду прыносіць гэта цуда тэхнікі навакольнаму асяроддзю і кожнаму з нас. А гэта шкода вельмі вялікая – забруджванне паветра, якое мы ўдыхаем штосекундна, выхлапныя газы і бясконцыя аварыі, у якіх гінуць тысячы людзей штодня.

Павелічэнне колькасці аўтатранспарту ставіць аўтамабіль на адно з першых месцаў сярод крыніц забруджвання атмасфернага паветра. У выхлапных газах аўтамабіляў змяшчаецца вялікая колькасць шкодных рэчываў, якія адмоўна ўплываюць на здароўе чалавека. Асноўнымі з іх з’яўляюцца вокіс вугляроду, вокіслы азоту і серы, розныя вуглевадароды, альдэгіды, сажа і інш. На думку навукоўцаў, выхлапныя газы ўносяць прыкметную долю ў развіццё парніковага эфекту, які рана ці позна стане прычынай глабальнага змянення клімату Зямлі.

Выкіды транспарту ў большасці сваёй запасяцца на ўзроўні органаў дыхання чалавека, атручваючы паветра, а пры ссяданні – трапляюць у глебу і расліны, яны суправаджаюць нас практычна паўсюль – залятаюць на кухню праз фортку, пераследуюць у салоне аўтамабіля, на пешаходным пераходзе. А самае жудаснае ў тым, што найбольшым атручваннем падвяргаюцца менавіта дзеці – якраз на ўзроўні іх удыху канцэнтруецца найбольшая колькасць шкодных рэчываў.

Вопыт працы шэрагу краін паказаў, што вырашыць праблему выкідаў забруджвальных рэчываў у атмасферу без насельніцтва вельмі складана. Таму штогод 22 верасня ў многіх краінах свету праводзіцца Сусветны дзень без аўтамабіля.

Упершыню акцыя прайшла ў Францыі ў 1998 годзе. Тады ў мерапрыемстве ўдзельнічала ўсяго каля двух дзясяткаў гарадоў, да 2001 года да руху далучылася больш за тысячу гарадоў у 35 краінах свету.

У Беларусі Дзень без аўтамабіля праводзіцца з 2008 года. Мерапрыемства носіць добраахвотны характар. Яго асноўная задача – звярнуць увагу грамадскасці на забруджванне паветра, а таксама паказаць ролю кожнага чалавека ў вырашэнні дадзенай праблемы на шляху да здаровага ладу жыцця.

Акцыя «Дзень без аўтамабіля» з’яўляецца завяршальным этапам Еўрапейскага тыдня мабільнасці, які стартуе 16 верасня ў дзясятках краін свету. У гэтым годзе яна прысвечана прасоўванню нізкавугляродных відаў транспарту – «Мабільнасць без шкодных выкідаў». Дэвізам стане заклік «Выбірай, на чым рухацца».

У 2019 годзе ў агульнаеўрапейскай кампаніі прыняло ўдзел 76 гарадоў Беларусі. Сёлета ўжо зарэгістравалася 45 населеных пунктаў Сінявокай, у ліку якіх Бабруйск, Клічаў, Асіповічы.

Еўрапейскі тыдзень мабільнасці – выдатная нагода для гарадоў нашай вобласці падключыцца да еўрапейскіх інструментаў кіравання мабільнасцю і пацвердзіць арыентацыю на дасягненне Мэтаў устойлівага развіцця.