У Магілёве навучэнцы каледжа мастацтваў пакажуць старшакласнікам і іх бацькам спектакль аб адносінах у сям'і

Спектакль паводле п'есы Рыты Кадацкай «Картачка для Э.» падрыхтаваны выкладчыкамі і навучэнцамі Магілёўскага дзяржаўнага каледжа мастацтваў. Акцёры выступяць на сцэне сярэдняй школы № 24. У глядзельнай зале будуць старшакласнікі і іх бацькі, а таксама сацыяльныя педагогі магілёўскіх школ. Арганізатар дыскусіі на праблемную тэму сямейных узаемаадносін з элементамі арт-тэрапіі - Камісія па справах непаўналетніх Магілёўскага гарвыканкама.

У цэнтры спектакля - сучасная сям'я, а ўсё, што адбываецца, гледачы бачаць праз прызму ўспрымання хлопчыка. Аўтар расказвае пра сітуацыю, калі ў штодзённай мітусні бацькі не заўважаюць самага галоўнага — пачуццяў свайго дзіцяці. Галоўны герой - чатырохгадовы хлопчык, бацькі якога разводзяцца. Тэма нялюбасці і безадказнасці чырвонай ніткай праходзіць праз усю пастаноўку. На думку рэжысёра-пастаноўшчыка і занятых у спектаклі акцёраў, многім дарослым трэба часцей задаваць сабе пытанні: «Як даўно вы бавілі час са сваім дзіцем? Ці ведаеце, што яго трывожыць?».

Пасля прагляду спектакля гледачам, а гэта дзеці і дарослыя, будзе прапанавана абмеркаваць пытанні і праблемы ўзаемаадносін, узнятыя ў пастаноўцы. І праз разбор спектакля паспрабаваць разабрацца, як зберагчы дзіця ў крызісных сітуацыях, якія ўзнікаюць унутры сям'і.

СБ