Пытанне. У сувязі з нараджэннем трэцяга дзіцяці ў 2018 годзе сям’ёй адкрыты рахунак «Сямейны капітал» у падраздзяленні ААТ«ААБ Беларусбанк». Сям’я была на ўліку маючай патрэбу ў паляпшэнні жыллёвых умоў і, не чакаючы чаргі, купіла кватэру, узяўшы камерцыйны (спажывецкі) крэдыт. У крэдытным дагаворы не пазначаны звесткі аб яго выкарыстанні на будаўніцтва (рэканструкцыю) або набыццё жылога памяшкання. Ці можна датэрмінова распарадзіцца сродкамі сямейнага капіталу на пагашэнне запазычанасці па ўказаным крэдыце?
Адказ: У адпаведнасці з пунктам 2 Палажэння аб аднаразовым прадастаўленні сем’ям безнаяўных грашовых сродкаў пры нараджэнні (усынаўленні, удачарэнні) у 2015–2019 гадах трэцяга або наступных дзяцей, зацверджанага Указам Прэзідэнта Рэспублікі Беларусь ад 09.12.2014 № 572, сродкі сямейнага капіталу могуць быць выкарыстаны датэрмінова (незалежна ад часу, які прайшоў з даты прызначэння сямейнага капіталу) у Рэспубліцы Беларусь у поўным аб’ёме або па частках у безнаяўным парадку, у тым ліку на пагашэнне запазычанасці па крэдыце, у тым ліку прадастаўленым на будаўніцтва (рэканструкцыю) ці набыццё жылога памяшкання, і выплату працэнтаў за карыстанне ім.
У выпадку распараджэння сродкамі сямейнага капіталу на пагашэнне запазычанасці па крэдыце, у тым ліку льготным, прадастаўленым на будаўніцтва (рэканструкцыю) або набыццё жылога памяшкання, разам з заявай аб датэрміновым распараджэнні сродкамі сямейнага капіталу грамадзянінам прадстаўляюцца наступныя дакументы і (або) звесткі:
– пашпарт або іншы дакумент, які сведчыць асобу;
– рашэнне або копія рашэння (выпіска з рашэння) аб прызначэнні сямейнага капіталу;
– дакумент, які сведчыць асобу,і (або) пасведчанне аб нараджэнні члена сям’і, у дачыненні да якога датэрмінова выкарыстоўваецца сямейны капітал;
– дакументы, якія сведчаць асобу, і (або) пасведчанне аб нараджэнні, выпіскі з рашэнняў суда аб усынаўленні (удачарэнні), аб аднаўленні ў бацькоўскіх правах ці іншыя дакументы, якія пацвярджаюць уключэнне ў склад сям’і грамадзяніна, не ўлічанага ў яе складзе пры прызначэнні сямейнага капіталу (прадстаўляюцца на дзяцей, якія не былі ўлічаны ў складзе сям’і пры прызначэнні сямейнага капіталу);
– дакументы, якія пацвярджаюць роднасныя адносіны членаў сям’і (пасведчанне аб нараджэнні, пасведчанне аб шлюбе, аб змене імя, выпіска з рашэння суда аб усынаўленні (удачарэнні) і іншыя), – у выпадку змены прозвішча, уласнага імя, імя па бацьку, даты нараджэння паўналетняга члена сям’і, які звярнуўся па датэрміновае распараджэнне сродкамі сямейнага капіталу, і (або) члена сям’і, у дачыненні да якога датэрмінова выкарыстоўваецца сямейны капітал, пасведчанне аб смерці або даведка,якая змяшчае звесткі з запісу акта аб смерці, органа, які рэгіструе акты грамадзянскага стану (далей – орган загса), копія рашэння суда аб абвяшчэнні грамадзяніна памерлым, аб прызнанні яго без вестак адсутным, копія рашэння суда аб скасаванні шлюбу або пасведчанне аб скасаванні шлюбу ці іншы дакумент, які пацвярджае выключэнне са складу сям’і грамадзяніна, якому прызначаны сямейны капітал, або немагчымасць яго звароту, – у выпадку звароту паўналетняга члена сям’і, які не з’яўляецца грамадзянінам, якому прызначаны сямейны капітал, або законнага прадстаўніка непаўналетняга члена сям’і, які не адносіцца да членаў;
– даведка аб стане на ўліку маючых патрэбу ў паляпшэнні жыллёвых умоў – у выпадку стану на ўліку маючых патрэбу ў паляпшэнні жыллёвых умоў па месцы працы (службы);
– копія крэдытнага дагавора аб прадастаўленні крэдыту на будаўніцтва (рэканструкцыю) або набыццё жылога памяшкання.
Такім чынам, у крэдытным дагаворы павінны быць указаны звесткі аб яго выкарыстанні на будаўніцтва (рэканструкцыю) або набыццё жылога памяшкання.
У адваротным выпадку пагашэнне запазычанасці не прадугледжана заканадаўствам.
