Дэлегацыя Ленінградскай вобласці з двухдзённым візітам наведвае Магілёўшчыну. Адным з галоўных мерапрыемстваў праграмы стала восьмае пасяджэнне Сумеснай камісіі па развіцці супрацоўніцтва Рэспублікі Беларусь з гэтым расійскім рэгіёнам, якое адбылося 30 студзеня ў аблвыканкаме. Сустрэча прайшла пад кіраўніцтвам старшыні Магілёўскага абласнога выканаўчага камітэта Леаніда Зайца і намесніка старшыні ўрада Ленінградскай вобласці Алега Малашчанкі. Удзельнікі палілога абмеркавалі вынікі рэалізацыі праграмы гандлёва-эканамічнага і сацыяльна-гуманітарнага супрацоўніцтва паміж Урадам Рэспублікі Беларусь і ўрадам Ленінградскай вобласці на 2018-2020 гады і выкананне пунктаў пратаколу сёмага пасяджэння, які быў падпісаны 23 мая 2018 года. Таксама разглядаліся пытанні далейшага выбудоўвання ўзаемаадносін у сферы АПК, паставак пасажырскай, грузавой, дарожнай тэхнікі і ліфтавага абсталявання, будаўніцтва, жыллёва-камунальнай гаспадаркі. Асноўныя напрамкі развіцця партнёрства на перспектыву ляглі ў аснову пратакола, заверанага ў завяршэнне пасяджэння.
Пры выкарыстанні матэрыялаў актыўная гіперспасылка на mogilev-region.gov.by абавязковая