У Магілёве на набярэжнай Дняпра ля помніка воінам-інтэрнацыяналістам прайшоў урачысты мітынг-рэквіем з ускладаннем вянкоў і кветак, прысвечаны вываду савецкіх войскаў з Рэспублікі Афганістан. Юныя кадэты трымалі ў руках партрэты воінаў, якія ў 80-ыя гады мінулага стагоддзя праявілі мужнасць і гераізм і да канца засталіся верныя Воінскай прысязе. На маладых салдат, застылых на фота моўчкі глядзелі пасталелыя і пасівелыя аднапалчане, якія прайшлі праз ваеннае пекла. Да падножжа помніка леглі вянкі і кветкі ад дэлегацыі абласнога і гарадскога выканаўчых камітэтаў і Саветаў дэпутатаў, адміністрацый раёнаў горада, прадстаўнікоў сілавых структур, абласной і гарадской арганізацый грамадскага аб'яднання «Беларускі саюз ветэранаў вайны ў Афганістане», воінаў-інтэрнацыяналістаў, прадстаўнікоў працоўных калектываў, грамадскасці . Памяць загінуўшых воінаў ушанавалі хвілінай маўчання.
Фота Галіны Гаўрыловіч
Пры выкарыстанні матэрыялаў актыўная гіперспасылка на mogilev-region.gov.by абавязковая