Святкаваць Мядовы Спас у Слаўгарадскім раёне будуць 13–14 жніўня. Па традыцыі ў гэтыя дні на Блакітную крыніцу – помнік прыроды рэспубліканскага значэння – з'едуцца тысячы людзей з Беларусі і Расіі.

Людзі вераць: калі на Мядовы Спас тройчы перайсці возера, можна вылечыцца ад хвароб. Едуць сюды не толькі па фізічнае і душэўнае лячэнне, але і каб проста ўбачыць незвычайную крыніцу з чыстай не замярзальнай нават зімой вадой, унесеную ў спіс нематэрыяльнай культурнай спадчыны Беларусі, акунуцца ў атмасферу свята, якое аб'ядноўвае людзей.

Асноўныя мерапрыемствы разгорнуцца на Блакітнай крыніцы 14 жніўня. Пачнуцца яны ў 8:00 з малебна каля капліцы на крыніцы і Боскай літургіі. У 11:00 пачнецца асвячэнне вады і хрэсны ход вакол крыніцы, падчас якой таксама асвяцяць мёд, лекавыя травы.

– Пасля гэтага, у 14:00, стартуе конкурс «Спас – усяму гадзіна», удзел у якім прымуць творчыя калектывы Магілёўскай вобласці і іншых рэгіёнаў краіны. На пляцоўцы каля крыніцы размесцяцца гандлёвыя рады, пройдзе кірмаш «Мядовы Спас». Акрамя прадукцыі пчаляроў, мясцовых сыравараў, тут можна будзе набыць розныя стравы, а таксама аўтэнтычныя вырабы народных майстроў, прыняць удзел у майстар–класах «Зробім цуд самі». На свяце арганізуюць прэзентацыю турыстычнага патэнцыялу раёна. Увечары пройдуць паказальныя выступленні шматразовых чэмпіёнаў свету і Еўропы па акрабатычным спорце пад кіраўніцтвам майстра спорту міжнароднага класа, пяціразовай чэмпіёнкі свету Рэнаты Каладзінскай, – пералічвае начальнік аддзела ідэалагічнай работы і па справах моладзі Слаўгарадскага райвыканкама Таццяна Бабічава. — Праграма свята кожны год абнаўляецца, яно прырастае новымі лакацыямі, паломнікамі. У розныя гады сюды прыязджала ад 50 да 100 тысяч паломнікаў. Прыемна, што так шмат людзей хочуць дакрануцца да веры, традыцый, гісторыі, культуры. Будзем рады ўсім, хто плануе гэтымі днямі наведаць нашу гасцінную зямлю.

 СБ