Алена Богдан: рост колькасці інфіцыраваных COVID-19 у Беларусі – прагназаваная тэндэнцыя

Рост колькасці інфіцыраваных COVID-19 у Беларусі–прагназаваная тэндэнцыя. Пра гэта ў эфіры тэлеканала СТВ паведаміла намеснік міністра аховы здароўя Алена Богдан.

Алена Богдан пракаментавала дастаткова сур’ёзны рост колькасці інфіцыраваных. «Натуральна, гэта чакана, гэта прагназавана. І як бы нам ні хацелася, каб гэтага росту не было, усё роўна вопыт іншых краін паказвае, што тэмпы захворвання будуць павялічвацца», – канстатавала яна.

«На 300–400 чалавек на дзень апошнія некалькі дзён ёсць рост. У нас павялічылася колькасць тэстаў. Мы максімальна стараемся ахапіць тэставаннем абсалютна розны кантынгент насельніцтва», – звярнула ўвагу Алена Богдан.

Намеснік міністра дадала, што прадстаўнікі СААЗ, якія працавалі ў Беларусі ў складзе экспертнай місіі, заклікалі беларускіх калег не супакойвацца. «Яны гаварылі, што нам рана супакойвацца, і мы павінны далей працягваць рыхтаваць нашу сістэму аховы здароўя, каб максімальна аказаць дапамогу ўсім, хто мае ў гэтым патрэбу», – сказала яна.

БЕЛТА