Аляксандр Саксонаў: ад нас залежыць, у якое рэчышча мы накіруем энергію падрастаючага пакалення

У Магілёўскай вобласці на пленуме БРСМ прадставілі новага маладзёжнага лідара рэгіёна. Першым сакратаром абласной арганізацыі стаў Аляксандр Саксонаў.

«Саюзам моладзі зроблена шмат, і наша з вамі задача – захаваць гэты тэмп, – падкрэсліў Аляксандр Саксонаў. – У нашай працы ёсць як перамогі, так і недахопы, – не памыляецца той, хто нічога не робіць. Аднак я глыбока перакананы, што менавіта з гэтай камандай мы зможам запоўніць усе існуючыя прабелы. На нас, як на моладзевых лідараў, глядзяць, раўняюцца і мы павінны быць ва ўсім прыкладам. Моладзь – гэта будучыня нашай краіны, а мы выступаем у якасці яе каардынатараў, таму менавіта ад нас залежыць, у якое рэчышча мы накіруем энергію падрастаючага пакалення».

Маладзёжны лідар падкрэсліў, што ў першую чаргу на новай пасадзе плануе наведаць усе рэгіёны вобласці, надаць вялікую ўвагу працоўнай моладзі – паглядзець, як і ў якіх умовах яна працуе. «Акрамя таго, у кожным рэгіёне ёсць свае фішкі, але часам мы не паспяваем іх асвятляць. У маіх планах усё гэта паглядзець, акумуляваць і вырашыць, як выкарыстоўваць у моладзевым руху. Сёння трэба развіваць такія маштабныя патрыятычныя праекты, як «Дарогамі памяці і славы», які прайшоў па тэрыторыі рэгіёна напярэдадні Дня Перамогі і быў прымеркаваны да Года гістарычнай памяці», – сказаў ён.

Па словах Аляксандра Саксонава, усе маладзёжныя праекты павінны знаходзіцца ў плоскасці жывых зносін, каб знайсці водгук у сэрцах падрастаючага пакалення: «Усе нашы напрамкі работы павінны быць не за сталом, а ўжывую – праводзіцца на зямлі, нашых памятных гістарычных аб’ектах, каб можна было пранікнуцца важнасцю многіх момантаў. Сацыяльныя сеткі – гэта добра, але яны павінны быць у дапамогу рэальным справам».

Аляксандр Саксонаў родам з Круглянскага раёна, педагог па адукацыі: у 2013 годзе скончыў МДУ імя А. А. Куляшова, затым Акадэмію паслядыпломнай адукацыі. Паспеў стаць кандыдатам у майстры спорту па плаванні, 6 гадоў адпрацаваць настаўнікам у Александрыйскай школе Шклоўскага раёна і трэнерам па плаванні, затым у працоўнай біяграфіі былі пасады загадчыка сектара спорту і турызму Шклоўскага райвыканкама і дырэктара Забродскай сярэдняй школай.

Удзел у пленуме абласной арганізацыі Саюза моладзі прынялі намеснік старшыні аблвыканкама Валерый Малашка, начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка, сакратар Цэнтральнага камітэта БРСМ Варвара Сярова, кіраўнікі арганізацый і ведамстваў, грамадскіх аб’яднанняў. На адрас былога маладзёжнага лідара рэгіёна Уладзіміра Паўлоўскага прагучалі словы падзякі за ініцыятыву, актыўную жыццёвую пазіцыю і поўную аддачу ў працы.

Уладзіміру Паўлоўскаму за шматгадовую плённую працу ўручаны Ганаровая грамата Цэнтральнага Камітэта і залаты значок БРСМ. «Мы разам прайшлі доўгі шлях, многае ў нас атрымалася, удзельнічалі ў многіх палітычных кампаніях, – адзначыў ён. – Я ніколі не бачыў такой дружнай каманды, якая заўсёды, што б ні здарылася, прыходзіць на дапамогу. БРСМ – гэта наш дом і наша сям’я, якая прыме цябе ў любым рэгіёне, бо ўсюды ёсць аднадумцы. Ніколі не губляйце адзін аднаго».

БЕЛТА, фота Юліі Таранавай