Анатоль Ісачанка: жыццёва неабходна для кожнага з нас не разбураць і раз'ядноўваць, а разам працаваць і ствараць

Традыцыйна ў дзень святкавання 1 Мая ў абласным цэнтры ўшаноўвалі людзей працы. Ва ўрачыстым мерапрыемстве, якое адбылося сёлета ў гарадскім парку Падміколле, прынялі ўдзел старшыня Магілёўскага аблвыканкама Анатоль Ісачанка і старшыня абласнога Савета дэпутатаў Ірына Раінчык.

«Мяняецца час, але вось ужо многія дзесяцігоддзі нязменнай застаецца традыцыя адзначаць Першамай. І на мой погляд, менавіта сёння як ніколі актуальна падкрэсліць у назве свята важную дэталь з першамайскага лозунгу савецкіх часоў - гэта слова мір. Мір, праца, май, - адзначыў Анатоль Ісачанка, віншуючы жыхароў Магілёўшчыны са святам вясны і працы. - Безумоўна, гэты дзень аб'ядноўвае нас, натхняе людзей усіх узростаў і прафесій, прадстаўнікоў самых розных поглядаў, нацыянальнасцей і канфесій на сумленную працу на карысць рэгіёну і краіны. Сёння асабліва важна разумець, як жыццёва неабходна для кожнага з нас не разбураць і раз'ядноўваць, а разам працаваць і ствараць».

Анатоль Ісачанка падкрэсліў, што Магілёўская вобласць - рэгіён з высокім працоўным патэнцыялам: «Наша агульнае імкненне - дастойна працаваць, забяспечыць лепшае жыццё для дзяцей і ўнукаў, служыць надзейным фундаментам для дабрабыту нашых сем'яў і ствараць упэўненасць у заўтрашнім дні. Чалавек можа дасягнуць высокіх вынікаў, дзе б ён ні нарадзіўся і жыў, працаваў: працаваў ля станка, гадаваў хлеб, лячыў ці выхоўваў. Галоўнае заўсёды памятаць, што наша жыццё неаддзельнае ад лёсу роднай зямлі, а асабісты вынік кожнага чалавека вельмі неабходны для развіцця Прыдняпроўскага краю. Наша сумесная работа ўжо сёння забяспечвае планамерны рух наперад. Магілёўскі рэгіён з году ў год становіцца больш сучасным, камфортным і заслугоўвае гонару за свае поспехі і дасягненні».

На абласную Дошку гонару занесены лепшыя прадпрыемствы і арганізацыі па выніках працы за 2022 год. У сферы прамысловасці ў ліку лідэраў - ААТ «Зеніт»; ААТ «Стужка»; ААТ «ТаіМ»; ТАА «БелЭмса»; ПВУП «Газасілікат Магілёў»; ПУП «Універсал Бабруйск» ГА «Беларускае таварыства глухіх»; ААТ «Магілёўліфтмаш»; РУП «Бабруйская ўзбуйненая друкарня ім. А.Т. Непагодзіна». Сярод будаўнічых арганізацый - ДУК ДСП «Бялыніцкая перасовачная механізаваная калона № 241» і ДУК ДСП «Касцюковіцкая перасовачная механізаваная калона № 260». Сярод арганізацый сельскай і лясной гаспадаркі - ААТ «Магілёўскі лянок»; ЗАТ «Вялікія Славені»; ДЛГУ «Чавускі лясгас». У сферы транспарту, паштовых паслуг і тэлекамунікацый - ААТ «Аўтамабільны парк № 3 г. Магілёва». Лепшымі ў сферы гандлю, грамадскага харчавання і аказання бытавых паслуг сталі ААТ «Задняпроўе»; ТДА «Асарці Груп». Сярод арганізацый, якія ажыццяўляюць дзейнасць у сферы жыллёва-камунальнай гаспадаркі, - унітарнае вытворчае камунальнае прадпрыемства водаправодна-каналізацыйнай гаспадаркі «Магілёўаблводаканал». Сярод арганізацый сацыяльнай сферы - ДУА «Магілёўскае абласное кадэцкае вучылішча імя Героя Савецкага Саюза Яўгена Нікалаенка»; УА «Бабруйскае дзяржаўнае вучылішча алімпійскага рэзерву»; УАЗ «Магілёўскі абласны анкалагічны дыспансер»; УАЗ «Глуская цэнтральная раённая бальніца імя Заслужанага ўрача БССР А.С. Сямёнава»; УК «Магілёўскі абласны краязнаўчы музей ім. А.Р.Раманава»; установа «Глускі раённы цэнтр сацыяльнага абслугоўвання насельніцтва». Сярод арганізацый, якія ажыццяўляюць выдавецкую дзейнасць - КВУП «Інфармацыйнае агенцтва «Магілёўскія ведамасці».

Лаўрэатамі спецыяльнай прэміі Магілёўскага аблвыканкама ў сацыяльнай сферы сталі 40 жыхароў рэгіёна. Узнагароды студэнтам, навучэнцам і работнікам ва ўзросце да 31 года ўручаны ў сферах адукацыі, аховы здароўя, культуры і мастацтва, фізкультуры, спорту і турызму, СМІ, грамадска-палітычнай дзейнасці, сацыяльнай абароны насельніцтва.

«У Беларусі створаны ўсе ўмовы, каб кожны малады чалавек разумеў, што ён патрэбен сваёй краіне і што менавіта тут ён можа рэалізаваць свае ідэі і планы. А дзяржава яму ў гэтым дапаможа, - падкрэсліў першы сакратар абласной грамадскай арганізацыі БРСМ Аляксандр Саксонаў, віншуючы ўзнагароджаных. - Асноўная задача маладога пакалення - захаваць нашу спадчыну і надаць новы імпульс у развіцці нашай краіны. І я ўпэўнены, што разам у нас усё атрымаецца».

На гэтай жа сцэне адбылося ўшанаванне ўзнагароджаных ад Магілёўскага абласнога аб'яднання прафсаюзаў.

«На працягу многіх гадоў 1 Мая з'яўляецца сімвалам паразумення, міру і згоды, што асабліва важна для людзей розных прафесій і пакаленняў, – падзяліўся меркаваннем прафсаюзны лідэр рэгіёна Уладзімір Цумараў. - Першамай знамянальны тым, што аб'ядноўвае ўсіх працоўных, якія сваімі рукамі ствараюць будучыню свайго працоўнага калектыву, сваёй сям'і, сваёй краіны ў цэлым.

У гэты дзень мы славім мірную стваральную працу і чалавека працы, прафесіянала сваёй справы, які заўсёды карыстаецца заслужанай павагай у грамадстве».

Уладзімір Цумараў таксама адрасаваў словы віншаванняў ветэранам працы, прафсаюзным актывістам, прадстаўнікам працоўных дынастый за адданасць прафесіі, майстэрства, высокі прафесіяналізм, шматгадовую сумленную працу, жыццёвы і грамадскі вопыт, цвёрдую грамадзянскую пазіцыю. Звяртаючыся да маладога пакалення, ён папрасіў берагчы родны край і памнажаць яго дасягненні.

У парку Падміколле для жыхароў і гасцей Магілёва ў гэты дзень была арганізавана святочная праграма. Працавалі адкрытыя тэматычныя пляцоўкі, прайшлі канцэрты і выставы дасягненняў, дзе можна было прадэгуставаць прадукцыю прадпрыемстваў горада, пазнаёміцца з работамі рамеснікаў, узяць удзел у конкурсах, віктарынах, спартыўных гульнях і квэстах. Для юных жыхароў абласнога цэнтра былі даступны бясплатныя атракцыёны. Таксама ў гонар свята ў горадзе зарабілі фантаны.

Юлія Таранава, фота Галіны Гаўрыловіч