06.02.2023 - 17:03

Намеснік прэм'ер-міністра Анатоль Сівак правёў сёння нараду ў фармаце відэаканферэнцсувязі з усімі рэгіёнамі краіны. На парадку дня - паводкавая сітуацыя, стан аўтамабільных дарог і праца службаў ЖКГ. Абмяркоўваліся наяўныя праблемы і шляхі іх вырашэння.

У прыватнасці, як адзначыў віцэ-прэм'ер, у асобных рэгіёнах ужо ў студзені склалася неспрыяльная гідралагічная абстаноўка, звязаная з падтапленнем паводкавымі і талымі водамі асобных участкаў дарог і мастоў, жылых дамоў, прыватных падворкаў і дач.

У сваю чаргу, намеснік старшыні Магілёўскага аблвыканкама Генадзь Дзенгалёў, падчас размовы з журналістамі, растлумачыў:

«У выніку багатага выпадзення снега ў снежні-студзені і яго раставання, у Магілёўскай вобласці было зафіксавана восем выпадкаў падтапленняў участкаў дарог і чатыры - нізкаводных мастоў. На сёння захоўваецца падтапленне толькі аднаго з мастоў і аднаго ўчастка дарогі ў Мсціслаўскім раёне.

Жыццядзейнасць ніводнага з населеных пунктаў у выніку падтапленняў не была спынена - пад'езды былі арганізаваны па аб'язных дарогах і тэхнікай павышанай праходнасці. Далейшую сітуацыю трымаем на пастаянным кантролі. Па досведзе шматгадовых назіранняў мы ведаем, у якіх раёнах існуе магчымасць падтапленняў. На такія выпадкі ўжо выпрацаваны шэраг мерапрыемстваў. І пры неабходнасці будзе арганізаваны падвоз лекаў, прадуктаў харчавання і шэраг іншых неабходных мер.

Нават на выпадак сур'ёзнай надзвычайнай сітуацыі з паводкамі, для ліквідацыі сітуацыі мы гатовыя выпусціць каля 400 адзінак тэхнікі, мабілізаваць каля трох тысяч чалавек».

Юлія Таранава, фота Галіны Гаўрыловіч