Больш за Br90 тыс. для дзвюх дзіцячых устаноў сабралі ў тэлемарафоне «Сагрэем дзіцячыя сэрцы» ў Магілёўскай вобласці

Аб выніках дабрачыннага тэлемарафону «Сагрэем дзіцячыя сэрцы» ў Магілёўскай вобласці ў межах акцыі «Нашы дзеці» расказала дырэктар Магілёўскага абласнога аддзялення РГА «Беларускі дзіцячы фонд» Ірына Фісюк.

Дырэктар падкрэсліла, што мэтай тэлемарафону заўсёды з’яўляецца адрасная дапамога. Ірына Фісюк нагадала, што ў мінулым годзе дзякуючы тэлемарафону Беларускі дзіцячы фонд змог дапамагчы 33 сем’ям. «33 хлопчыкі і дзяўчынкі атрымалі адрасную дапамогу з гэтых сродкаў. Гэта не салодкія падарункі, гэта канкрэтныя сродкі рэабілітацыі і сродкі на лячэнне дзяцей, таму мы лічым, што такім чынам грамадскасць рэагуе і актыўна ўдзельнічае ў шырокай рэспубліканскай акцыі “Нашы дзеці”», – расказала дырэктар.

Яна дадала, што сёлета было вырашана ўсе сродкі, сабраныя за дзень у тэлемарафоне, накіраваць на набыццё інтэрактыўнага абсталявання для дзяцей, якія займаюцца ў дзвюх установах у Магілёўскай вобласці, – абласны карэкцыйны цэнтр і Бабруйская спецыяльная школа для дзяцей з асаблівасцямі слыху. «Я думаю, што сёння мы ўжо можам сказаць аб некаторых лічбах. Br91,7 тыс. паступіла на рахунак марафону. Гэта дазволіць нам выканаць пастаўленую задачу і нават звыш яе», – заключыла Ірына Фісюк.

Праект створаны за кошт сродкаў мэтавага збору на вытворчасць нацыянальнага кантэнту.

БЕЛТА