Частаваць мёдам і навучаць тонкасцям пчалярства будуць 1-2 сакавіка на форуме ў Крычаве

Другі рэспубліканскі форум пчаляроў збярэ вопытных і паынаючых спецыялістаў па гадоўлі пчол 1-2 сакавіка ў Крычаве, у праграме мерапрыемства-майстар-класы, віктарына, круглы стол, выстава, дэгустацыя. Пра гэта паведамілі ў КУП «Моладзевая сацыяльная служба».

У першы дзень удзельнікі мерапрыемства пагавораць аб мэтазгоднасці выкарыстання кандзі (падкормкі для пчол), а таксама аб перапрацоўцы мёду, лячэнні і апрацоўцы пчол, зімоўцы, стымуляцыі і развіцці насякомых вясной. На другі дзень запланавана ўзнагароджанне пераможцаў конкурсу дзіцячых малюнкаў «Крычаўская пчолка», віктарына для навучэнцаў аграрных класаў навучальных устаноў Крычаўскага раёна «Што я ведаю пра пчол?» з дэгустацыяй мёду, круглы стол «Сустрэча пчаляроў і прадстаўнікоў улады».

Другі рэспубліканскі форум пчаляроў праводзіцца ў межах праекта «Садзейнічанне занятасці і самазанятасці насельніцтва ў малых і сярэдніх гарадах Беларусі», які рэалізуецца Праграмай развіцця ААН і Міністэрствам эканомікі Беларусі пры фінансавай падтрымцы Расіі. У ліку задач мерапрыемства – абмен вопытам, пошук патэнцыйных партнёраў, навучанне тонкасцям пчалярства. Адным з ключавых момантаў стане абмеркаванне пытання стварэння вытворчага цэха па перапрацоўцы мёду ў Крычаве.

У форуме могуць прыняць удзел усе жадаючыя.

Арганізатарамі выступаюць цэнтры падтрымкі прадпрымальніцтва Барані і Крычава, КУП «Моладзевая сацыяльная служба».

БЕЛТА