Дзяржаўныя ўзнагароды ўручылі аграрыям Магілёўшчыны

Намеснік прэм'ер-міністра Леанід Заяц уручыў працаўнікам аграпрамысловага комплексу Магілёўшчыны дзяржаўныя ўзнагароды і аб'явіў Падзяку Прэзідэнта Рэспублікі Беларусь адной з гаспадарак рэгіёну. Урачыстая цырымонія адбылася сёння падчас паседжання абласнога выканаўчага камітэта.

Леанід Заяц падзякаваў аграрыям за іх уклад у развіццё галіны: «Ваша праца накіравана на развіццё ўсяго аграпрамысловага комплексу. Жадаю Магілёўскай вобласці больш за такіх герояў. Добрага надвор'я і каб восень надарыла багатым ураджаем».

За шматгадовую плённую працу, значны асабісты ўклад у развіццё аграпрамысловага комплексу, дасягненне высокіх вытворчых паказчыкаў медалём «За працоўныя заслугі» адзначаны трактарыст-машыніст ААТ «Горацкая райаграпрамтэхніка» Уладзімір Афанасьеў, фармоўшчык каўбасных вырабаў ААТ «Магілёўскі мясакамбінат» Зінаiда Камарова, трактарыст-машыніст ЗАТ «Сервалюкс Агра» Сяргей Май, кіроўца пагрузчыка ААТ «Кіраўскі райаграпрамтэхзаб» Андрэй Хлапкоў.

Так, Зінаіда Камарова без малога 45 гадоў працуе на мясакамбінаце, куды прыйшла пасля заканчэння вучылішча ў 1978 годзе.

«Каб так надоўга затрымацца на адным месцы, трэба любіць сваю працу. Тады і працуецца добра, - кажа жанчына. - Калектыў у нас дружны. Працу сваю выконваю якасна, жадаецца, каб людзі набывалі нашу прадукцыю з задавальненнем. Такую высокую ўзнагароду атрымліваю ўпершыню, вельмі хвалююча. І, вядома, прыемна, што тваю працу бачаць і адзначаюць».

За значны асабісты ўклад у развіццё сельскагаспадарчай галіны, дасягненне высокіх вытворчых паказчыкаў аб'яўлена Падзяка Прэзідэнта Рэспублікі Беларусь калектыву работнікаў адкрытага акцыянернага таварыства «Новагародзішчанскае» Шклоўскага раёна, таксама гаспадарцы ўручаны падарункавы сертыфікат на набыццё трактара BELARUS 1222.