02.09.2020 - 11:25

ААТ «Магатэкс» распрацавала шматразовы ахоўны касцюм для працы ва ўмовах заражэння небяспечнымі інфекцыямі. Пра гэта паведамляецца на сайце канцэрна «Беллегпрам».

Касцюм створаны з мембраннай тканіны PROTO 65“, распрацаванай спецыялістамі магілёўскага прадпрыемства ў строгай адпаведнасці з санітарнымі і гігіенічнымі патрабаваннямі, вызначанымі Міністэрствам аховы здароўя Беларусі.

Увесну гэтага года прадпрыемства ўжо паставіла расійскім партнёрам 50 тыс. м такой мембраннай тканіны для вырабу ахоўнага адзення на тэрыторыі Расійскай Федэрацыі. У далейшым плануюцца адгрузкі як у краіну-суседку, так і Украіну.

Паралельна вялася работа па правядзенні выпрабаванняў PROTO 65“ і афармленні неабходных дакументаў у Беларусі з тым, каб наладзіць вытворчасць ахоўных касцюмаў на базе ААТ «Магатэкс».

Касцюм складаецца з камбінезона і высокіх бахілаў. Мае капюшон, маланку з ахоўным клапанам на ліпучках, які стварае рабро калянасці, якое не дазваляе маланцы заломвацца. Гэта істотна падымае яго надзейнасць у параўнанні з аналагамі. Швы злучэння дэталяў герметызаваны спецыяльнай стужкай.

Матэрыял уяўляе з сябе бяспоравую (гідрафільную) мембрану, якая сумяшчае поўную воданепранікальнасць і вывядзенне вільгаці, забяспечвае павышаную абарону ад пранікнення мікраарганізмаў у выпадку іх траплення на ахоўнае адзенне. «Дыхальныя» ўласцівасці мембраны ўзмацняюцца пры павышэнні тэмпературы цела чалавека.

Касцюм шматразовы і можа быць выкарыстаны ў медыцынскіх і ветэрынарных установах, камунальных, муніцыпальных службах, іншых арганізацыях пры ўзнікненні пагрозы распаўсюджвання інфекцый, якія перадаюцца кантактным і паветрана-кропельным шляхам.

У гэтты момант кампанія рыхтуе пакет дакументаў для правядзення дзяржаўнай рэгістрацыі камплекта адзення як вырабу медыцынскага прызначэння.

Нагадаем: ААТ «Магатэкс» у перыяд абвастрэння эпідэміялагічнай абстаноўкі наладзіла вытворчасць бытавых павязак і медыцынскіх масак з нятканых матэрыялаў. Усяго за люты–красавік з канвеера прадпрыемства выйшаў 1 млн. ахоўных вырабаў.