«Магілёўдрэў» амаль цалкам пераарыентаваў аб’ёмы экспарту з еўрапейскіх на ўсходнія рынкі

ААТ «Магілёўдрэў» з красавіка пераарыентавала аб’ёмы экспарту з еўрапейскіх на ўсходнія рынкі на 95%. Пра гэта расказаў генеральны дырэктар прадпрыемства Сяргей Фідзельскі.

«Мінулы год склаўся для нашага прадпрыемства больш чым удала: аб’ём выпушчанай прадукцыі ў параўнанні з 2020-м вырас на 150%. Мы экспартна арыентаванае прадпрыемства, і 65% ад агульнага аб’ёму вытворчасці пайшло на экспарт. Такія тэндэнцыі захоўваюцца і сёння, – расказаў Сяргей Фідзельскі. – У цэлым за 2021 год мы прыраслі па экспарце на 160%. Гэты рывок дазволіў «Магілёўдрэву» стаць пераможцам штогадовага спаборніцтва па сацыяльна-эканамічным развіцці ў намінацыі «Найлепшая прамысловая арганізацыя горада Магілёва».

Нягледзячы на палітыку санкцыйнага ціску, прадпрыемства працуе ў штатным рэжыме без прастояў і прыпынення вытворчасці. У гэты перыяд як ніколі актуальным застаецца дэвіз: не варта прыдумваць прычыны і адгаворкі, трэба шукаць рашэнне праблемы. «Хто хоча працаваць добра і прадуктыўна – будзе, бо, калі ва ўсіх адно жаданне, магчымасці абавязкова знойдуцца, – упэўнены гендырэктар. – Сітуацыя, якая склалася, стала для многіх выпрабаваннем на трываласць і магчымасцю ў кароткія тэрміны выпрацаваць аптымальныя рашэнні для далейшага развіцця вытворчасці».

На думку Сяргея Фідзельскага, рашэнне такіх задач цікавае для любога прафесіянала: «Новая праца і пошук новых ідэй заўсёды даюць імпульс да развіцця, стымулююць паступальны рух наперад. Калі мы ў сакавіку сутыкнуліся з наступствамі вядомых усім падзей ва Украіне, ваганняў не было: адразу пачалася праца на перспектыву. Так, калі ў студзені-лютым у структуры экспарту Еўропа займала каля 70%, то сёння доля гэтых краін скарацілася ўсяго да 5% і да канца мая зусім наблізіцца да нуля. Цяпер мы развярнуліся ў бок усходняга рынку, і практычна ўся прадукцыя ідзе менавіта ў гэтым кірунку – Расія, Кітай, Іран, Азербайджан і іншыя. Гэта таксама прыбыткова і рэнтабельна».

Зараз запатрабаваны ўвесь спектр прадукцыі прадпрыемства – ад мэблі і піламатэрыялаў да паганажных вырабаў. Напрыклад, раней мэбля ў Расію не пастаўлялася, а цяпер аб’ёмы растуць. Пакупнікоў прываблівае сучасны дызайн, шырокі мадэльны рад і, вядома ж, экалагічнасць – прадукцыя Магілёўскай вытворчасці з масіву хвоі карыстаецца папулярнасцю. У сваю чаргу азербайджанскія пакупнікі зацікаўлены ў пастаўках мэблевага шчыта і паганажу – дошка падлогі, ашалёўка, габляваныя вырабы розных профіляў. Прычым гэта не разавыя заказы, а планамернае супрацоўніцтва.

ААТ «Магілёўдрэў» – адно з вядучых прадпрыемстваў Беларусі па выпуску экалагічна чыстай мэблі і сталярных вырабаў з масіву хвоі і іншых парод драўніны. У асартыментны рад уваходзяць наборы мэблі, мэблевыя шчыты, дошка падлогі, ліштва, абшыўка, плінтус, блок-хаус, а таксама піламатэрыялы. Уся вырабляемая прадукцыя праходзіць сертыфікацыю і санітарна-эпідэміялагічны кантроль. Сярэдняя спісавая колькасць работнікаў складае каля 460 чалавек.

БЕЛТА