Маладыя выратавальнікі рэгіёна прынялі прысягу ва ўрачыстай абстаноўцы

Маладыя выратавальнікі рэгіёна прынялі прысягу ў прафесійнае свята. Ва ўрачыстай абстаноўцы ў Палацы культуры вобласці 19 студзеня рады супрацоўнікаў МНС папоўнілі 50 чалавек.

Удзельнікамі цырымоніі сталі кіраўніцтва і супрацоўнікі Магілёўскага абласнога ўпраўлення МНС, ветэраны пажарнай аварыйна-выратавальнай службы, члены сем’яў і блізкія работнікаў, прадстаўнікі Магілёўскага аблвыканкама і абласнога Савета дэпутатаў, Беларускай Праваслаўнай Царквы.

«Новыя людзі – гэта развіццё і будучыня нашай службы. Мы хочам, каб яны сталі сапраўднымі прафесіяналамі і, вядома ж, былі патрыётамі сваёй Радзімы. Чакаем ад іх добрасумленнага выканання задач па выратаванні людзей і ліквідацыі надзвычайных сітуацый, – адзначыў начальнік Магілёўскага абласнога ўпраўлення МНС Сяргей Дзямідаў. – Я хацеў бы ім пажадаць добрай вучобы. Сапраўднаму выратавальніку неабходна авалодаць вялікай колькасцю ведаў і, вядома ж, браць прыклад са сваіх старэйшых таварышаў, глядзець на ветэранаў, якія наведваюць падраздзяленні. Заўсёды развівацца і ўдасканальвацца».

У ліку маладых навабранцаў – Анастасія Мацкевіч, якая будзе праходзіць службу ў ПВСА № 7 на аб’ектах ААТ «Белшына» ў Бабруйску радыётэлефаністам. Дзяўчына родам з Брэсцкай вобласці.

«Я прыехала сюды працаваць, таму што вельмі хацелася служыць у МНС. Праца падабаецца, хоць яна і складаная, але вельмі патрэбная для людзей, таму што хто, калі не мы, будзе прыходзіць ім на дапамогу, – падзялілася дзяўчына. – Мая праца заключаецца ў тым, што я прымаю званкі ад людзей аб пажарах і надзвычайных сітуацыях».

Па слядах бацькі прыйшоў у прафесію яшчэ адзін навабранец – Максім Маісееў.

«Мой бацька служыў у МНС. Я ім вельмі ганаруся, і яго прыклад стаў вырашальным у выбары маёй будучай прафесіі, – расказаў ён. – Я працую ў Магілёве, працягваю вучыцца ва ўніверсітэце. Сам я яшчэ нікога не ратаваў, але хлопцы з майго падраздзялення нядаўна выратавалі трох чалавек: пачаўся пажар у кватэры на чацвёртым паверсе, дым падымаўся на пяты. Пры дапамозе аўталесвіцы эвакуявалі дзіця і яшчэ двух чалавек».

Працягнулася ўрачыстае мерапрыемства вялікім святочным канцэртам у Палацы культуры вобласці і ўручэннем заслужаных узнагарод.

Віншуючы выратавальнікаў з прафесійным святам, намеснік старшыні Магілёўскага аблвыканкама Сяргей Маслаў адзначыў, што ў Магілёўскай вобласці ў 2021 годзе пры пажарах выратавана больш за 60 чалавек.

«Магілёўскае абласное ўпраўленне МНС – адно з найлепшых у рэспубліцы. Штодня, рызыкуючы жыццём і здароўем, вы цвёрда і з адчайнай упартасцю супрацьстаіце націску стыхіі, тэхнагенным аварыям і вогненнай бядзе. Кожны выклік – гэта просьба аб дапамозе. Спакой жыхароў Магілёўскай вобласці ахоўвае 2,5 тыс. чалавек, – сказаў Сяргей Маслаў. – За кожным выратаваным жыццём стаяць лёсы людзей і іх сем’яў. Ад жыхароў Прыдняпроўскага краю, ад выканаўчай улады прыміце словы падзякі за вашу вернасць грамадзянскаму абавязку. Асаблівыя словы падзякі – ветэранам выратавальнай службы, якія зараз перадаюць свой вопыт маладому пакаленню.

У Беларусі выбудавана і эфектыўна працуе сістэма рэагавання на надзвычайныя сітуацыі, у якой працуюць сапраўдныя прафесіяналы і адказныя людзі. Гэта выклікае асаблівы гонар за сваю прафесію. У святочны дзень хачу пажадаць вам добрага здароўя, надзейных тылоў, цвёрдасці духу, верных і надзейных таварышаў і калегаў. Беражыце сябе і спакой нашага краю».

Выступаючы перад удзельнікамі свята, намеснік старшыні Магілёўскага абласнога Савета дэпутатаў Уладзімір Рыжанкоў падзякаваў ім за высакародную службу і пажадаў, каб мужнасць заўсёды адпавядала разумнай рызыцы ў імя жыцця.

У сваю чаргу, старшыня Магілёўскага гарадскога Савета дэпутатаў Максім Гурын падкрэсліў, што складана пераацаніць працу выратавальнікаў, калі штодня, рызыкуючы ўласным жыццём, яны выконваюць сваю працу:

«Бясспрэчна, што ваша служба – гэта доля моцных і мужных людзей, адданых сваёй прафесіі, людзей, якія валодаюць багатым вопытам і, вядома ж, высокай кваліфікацыяй. Выратаванне чалавечага жыцця – гэта сапраўды складаная і адказная, вельмі ганаровая праца. У вашай прафесіі не кожны здольны вытрымаць, але той, хто застаўся верны справе, хто прысвяціў сваё жыццё служэнню Айчыне і людзям, заслугоўвае самых высокіх слоў падзякі. Людзям важна ведаць, што побач з імі ёсць такія прафесіяналы, гатовыя прыйсці на дапамогу ў любую хвіліну. Вашы прафесіяналізм, адказнасць і рашучасць з’яўляюцца залогам спакойнага жыцця нашых грамадзян, бяспекі прамысловых аб’ектаў і сацыяльнай інфраструктуры. Перакананы, што ваша служба і надалей з гонарам будзе выконваць задачы, якія стаяць перад ёй, будзе захоўваць і памнажаць традыцыі».

Юлія Таранава, фота Галіны Гаўрыловіч.