13.02.2026 - 11:56

Важныя паказчыкі вобласцю дасягнуты, намецілася вельмі добрая дынаміка, у прыватнасці ў выкананні інвестыцыйнай праграмы, што сведчыць аб добрым задзеле на будучыню. Такой думкай падзяліўся кіраўнік Адміністрацыі Прэзідэнта Рэспублікі Беларусь Дзмітрый Крутой ў час пасяджэння аблвыканкама аб выніках сацыяльна-эканамічнага развіцця і выканання бюджэту вобласці за 2025 год.


«Вобласцю не выкананы ключавы паказчык – валавы рэгіянальны прадукт, але з іншага боку, многія важныя паказчыкі дасягнуты і намецілася вельмі добрая дынаміка, – адзначыў Дзмітрый Крутой. - Аб добрым задзеле на будучыню кажа выкананне інвестыцыйнай праграмы. Ужо які год рэгіён расце тэмпамі больш за 110%, прычым гэта інвестыцыі за кошт усіх крыніц. І, нягледзячы дзесьці на бягучыя складанасці ў шэрагу прадпрыемстваў, інвестыцыйныя рэсурсы, якія закладаліся ў адпаведныя праграмы, у любым выпадку выдзяляюцца ў поўным аб'ёме. Кожны разумее, што ад ступені і хуткасці тэхнічнага пераўзбраення, якое намечана, залежыць будучыня гэтых заводаў.

Бягучы валавы рэгіянальны прадукт, у першую чаргу, не выкананы з-за прамысловых прадпрыемстваў рэспубліканскай формы ўласнасці, па якіх дынаміка аб'ёмаў вытворчасці склалася за мінулы год на ўзроўні 91%. Гэта значна ніжэй за тыя тэмпы, якія паказалі прыватныя прамысловыя прадпрыемствы і прадпрыемствы камунальнай формы ўласнасці, якія свае заданні выканалі. Па шэрагу рэспубліканскіх прадпрыемстваў існуюць складанасці, у першую чаргу, звязаныя з бягучым станам экспартных рынкаў - рынку Расійскай Федэрацыі і шэрага іншых краін, дзе яны традыцыйна прысутнічалі. Таму сёння разглядаліся варыянты антыкрызісных праграм і дзеянняў кіраўніцтва дадзеных арганізацый, маркетынгавых службаў».

Як падкрэсліў кіраўнік Адміністрацыі Прэзідэнта, рэсурсы падтрымкі - фінансавыя інструменты, дадатковыя прэферэнцыі для экспарцёраў - сёння могуць быць прадастаўлены: «Адпаведныя сродкі ёсць і ў нашых банкаў, у першую чаргу, Банка развіцця і Нацыянальнага банка.Але тут трэба дзве асноўныя ўмовы.Гэта доўгатэрміновыя экспартныя кантракты са стабільным вяртаннем валютнай выручкі і інвестыцыйныя праекты. Калі ў праграмаў ёсць адпаведныя бізнес-планы і напрацоўкі, яны могуць адпаведную дзяржаўную падтрымку атрымаць. Такіх магчымасцяў для нашых экспарцёраў, якія ёсць зараз, у нас не было ніколі. З улікам таго, што ў мінулай пяцігодцы экспарт стаў адным з паказчыкаў, які быў выкананы ў поўным аб'ёме, зразумела, ён застаецца прыярытэтам і ўсе разумеюць, што з улікам адкрытасці нашай эканомікі, у любым выпадку, праца на знешніх рынках будзе ключавым элементам агульнага выніку і агульнага поспеху».

Каментуючы стан спраў у астатніх галінах, Дзмітрый Крутой, у першую чаргу, звярнуў увагу на сітуацыю ў жывёлагадоўлі, адзначыўшы, што агульныя лічбы ў сельскай гаспадарцы выглядаюць нядрэнна: «Тэмп росту па сельгасарганізацыях – 107,3%.Гэта крыху недабор да планавых лічбаў, але, у прынцыпе, гэта не горшы паказчык у маштабах рэспублікі. У першую чаргу, ён дасягнуты за кошт добрага ўраджаю і паспяховай нарыхтоўкі кармоў у мінулым годзе - плюс 15-20 працэнтаў у залежнасці ад іх відаў. Але пытанне ператварэння гэтых кармоў у малако і мяса, на жаль, сутыкаецца з пэўнымі цяжкасцямі менавіта на рэгіянальным узроўні».

Адзначыў кіраўнік Адміністрацыі Прэзідэнта і тое, што паралельна ідзе праграма па будаўніцтве малочнатаварных комплексаў, прафілакторыяў для цялят, пакупкі высокаэфектыўнай сельскагаспадарчай тэхнікі: «Гэтыя праграмы выконваюцца ў поўным аб'ёме, але бягучыя складанасці, звязаныя з падрыхтоўкай да вясновых палявых работ і тыя прыклады, якія прыводзіў, у тым ліку, камітэт дзяржкантролю (на паседжанні выканкама. – Заўв. рэд.), звязаныя з наяўнасцю ўгнаенняў, насення, гатоўнасці тэхнікі, вядома, патрабуюць аператыўнага рашэння. Літаральна з заўтрашняга дня, таму што засталося не так шмат часу».

Пракаментаваў Дзмітрый Крутой і рэалізацыю ў галіне ініцыятывы «Адзін раён - адзін праект»: «За мінулую пяцігодку цалкам рэалізавана 25 праектаў, створана 1,1 тыс. працоўных месцаў. Практычна Br1 млрд інвестыцый выкарыстаны на гэтыя рэгіянальныя ініцыятывы». Пры гэтым ён падкрэсліў, што маюць месца і некаторыя цяжкасці: «Гэтыя пытанні ніхто рэтушаваць не будзе, таму што гэта ўплывае на дасягненне агульнага выніку, які даведзены рэгіёну па 2026 годзе. І сёння пастаўлена задача старшыням райвыканкамаў, з улікам таго, што гэта праграма прадоўжана на наступны цыкл, шукаць новыя праекты і працаваць з адпаведнымі арганізацыямі. Тым больш, такія прадпрыемствы ў нас ёсць. Гэта бачна па аб'ёме імпартазамяшчальнай прадукцыі - рэгіён выканаў адпаведнае заданне ўрада.

Гэта таксама адзін з вельмі добрых прыкладаў працы ў эканоміцы Магілёўшчыны. У мінулым годзе $1,1 млрд у эквіваленце. Што прыемна, са 140 арганізацый, якія ўдзельнічалі ў гэтай праграме імпартазамяшчэння, 50% - гэта малыя і сярэднія прадпрыемствы, якія абсалютна справядліва ставяць пытанне больш свабоднага доступу да адпаведных ільготных інвестыцыйных рэсурсаў у рамках гэтай ініцыятывы».

Расказаў Дзмітрый Крутой і аб далейшых планах на так званы «індывідуальны» ўказ Прэзідэнта, звязаны з першачарговым развіццём паўднёва-ўсходніх рэгіёнаў вобласці: «У ім удзельнічаюць сем раёнаў. Гэтая праграма фармальна скончылася ў 2025 годзе. Але ўсе прэферэнцыйныя падатковыя і іншыя льготы, якія там былі закладзены, будзе прапанавана Прэзідэнту нашай краіны прадоўжыць на перыяд да 2030 года з улікам таго, што вельмі шмат праектаў было рэалізавана ў рамках гэтага ўказа і ён стаў вельмі добрай дапамогай для эканомікі Магілёўшчыны».

Юлія Таранава, фота Галіны Гаўрыловіч