Меры па ліквідацыі неабгрунтаванага пасрэдніцтва пры закупцы тавараў і рэалізацыі прадукцыі абмеркавалі ў аблвыканкаме

Пасяджэнне абласной камісіі па супрацьдзеянні карупцыі адбылося сёння ў Магаблвыканкаме ў фармаце відэаканферэнцсувязі. Асноўная ўвага была засяроджана на разглядзе пытання рэалізацыі плана мерапрыемстваў па ліквідацыі неабгрунтаванага і нядобрасумленнага пасрэдніцтва пры закупцы тавараў і рэалізацыі прадукцыі ў арганізацыях будаўнічага і аграпрамысловага комплексу, дзяржаўных лесагаспадарчых устаноў рэгіёна за мінулы перыяд. Таксама адбылося абмеркаванне выкарыстання бюджэтных сродкаў пры рэалізацыі дзяржаўных праграм па пераадоленні наступстваў катастрофы на Чарнобыльскай АЭС, будаўніцтва жылля і дарог на 2021–2025 гады.

«Пытанне неабгрунтаванага пасрэдніцтва абмяркоўваецца не ўпершыню. Разам з тым, ёсць неабходнасць правесці аналіз праведзенай работы і вызначыць далейшы кірунак нашага сумеснага руху, – адзначыў намеснік старшыні аблвыканкама Руслан Страхар. – У межах выканання названага плана ў вобласці праводзіцца шэраг мерапрыемстваў ва ўсіх арганізацыях рэгіёна, у тым ліку ў сферах лясной гаспадаркі, аграпрамысловага і будаўнічага комплексаў.

У адпаведнасці з даручэннямі, дадзенымі на пасяджэнні камісіі ў снежні мінулага года, структурнымі падраздзяленнямі аблвыканкама і гаррайвыканкамамі ў першым паўгоддзі 2022 года быў праведзены выбарачны аналіз па пытанні выканання заканадаўства пры правядзенні працэдур закупак у падпарадкаваных арганізацыях і арганізацыях, размешчаных на падведамнай тэрыторыі. Пры гэтым парушэнні заканадаўства закупак былі выяўлены як пры правядзенні працэдур дзяржаўных закупак, так і за кошт уласных сродкаў.

Аналіз паказаў, што суб’ектамі гаспадарання не ў поўнай меры выконваюцца нормы дзеючага заканадаўства ў галіне закупак. Парушэнні датычацца парадку выбару працэдур або правядзення закупкі, заключэння дагавораў без працэдуры закупкі, таксама выяўленыя яны і пры фарміраванні конкурснай камісіі, у фармальным правядзенні пасяджэнняў.

Акрамя парушэння заканадаўства аб закупках, кантралюючыя органы выявілі факты іншых парушэнняў, у сувязі з чым і ўзнікла неабходнасць правядзення чарговага пасяджэння і выпрацоўкі мер па іх ліквідацыі».

У ходзе пасяджэння былі заслуханы прадстаўнікі кантралюючых органаў, кіраўнікі адпаведных структур аблвыканкама і гаррайвыканкамаў. Была дадзена прававая ацэнка выяўленых пры праверцы фактаў парушэнняў, агучаныя прадпрымаемыя крокі, у тым ліку па прыцягненні да адказнасці, унесены прапановы па ўдасканаленні працы ў пазначаным кірунку.

Юлія Таранава, фота Галіны Гаўрыловіч