Рус Бел Eng 中文

На базе 83-га асобнага інжынерна-аэрадромнага палка адкрыўся ваенна-патрыятычны лагер для юныхбабруйчан

Агнявая, страявая, тактычная падрыхтоўкі, знаёмства з побытам вайскоўцаў, майстар-класы з узбраеннем, ваеннай і спецыяльнай тэхнікай – усё гэта чакае дзяцей і падлеткаў – удзельнікаў ваенна-патрыятычнага лагера «Патрыёт», першая змена якога адкрылася на базе 83-га асобнага інжынерна-аэрадромнага ордэна Чырвонай Зоркі палка.

Сцены вайсковай часці ўжо 10-ы год запар прымаюць дзяцей і падлеткаў Бабруйска ў межах штогадовага летняга ваенна-патрыятычнага лагера з кругласутачным знаходжаннем «Патрыёт». Напярэдадні адкрыцця першай змены дзеці і падлеткі рассяліліся ў казарме вайсковай часткі, прайшлі першапачатковыя заняткі па выкананні распарадку дня і страявой падрыхтоўцы. Асаблівую ўвагу дзяцей і падлеткаў прыцягнула знаёмства з вайсковай часцю, у межах якога была праведзена экскурсія ў пакоі баявой славы вайсковай часці, выхаванцы лагера азнаёміліся з бытам ваеннаслужачых тэрміновай ваеннай службы.

Як расказала намеснік дырэктара па вучэбна-выхаваўчай рабоце ДУА «Цэнтр дадатковай адукацыі дзяцей і моладзі г. Бабруйска», начальнік ваенна-патрыятычнага лагера «Патрыёт» Наталля Кашо, сёлета плануецца дзве змены: I-ая – з 5 па 13 ліпеня, II-ая – з 19 па 27 ліпеня. За час знаходжання ў лагеры дзяцей чакае насычаная праграма патрыятычнага выхавання, правядзенне мерапрыемстваў у межах Года народнага адзінства і абласнога праекта «Мая зямля». У лагеры знаходзяцца навучэнцы ўстаноў адукацыі (ва ўзросце ад 11 да 16 гадоў) горада Бабруйска. «Выхаванцы лагера – гэта тыя дзеці, якія сапраўды хочуць тут быць. Штодня з імі займаюцца вайскоўцы разам з педагогамі Цэнтра дадатковай адукацыі дзяцей і моладзі тактычнай і страявой падрыхтоўкай. Фізкультура і спорт тут на першым месцы. У выхадныя запланавана насычаная праграма. У суботу тут пройдзе «Прававы штурм». Сёння на гэтай змене адпачываюць хлопцы, якія і летась аздараўляліся ў «Патрыёце». Штогод многія прыязджаюць сюды паўторна. Юныя патрыёты забяспечаны пяціразовым харчаваннем. На шчасце, надвор’е дазваляе адпачываць і з карысцю праводзіць час на свежым паветры», – адзначыла суразмоўца.

Вучань ДУА «Сярэдняя школа № 12 г. Бабруйска», выхаванец лагера Максім Бублевіч тут ужо 2-гі год запар. Ён падзяліўся сваімі ўражаннямі «У лагеры мы жывём па распарадку. Ён тут досыць моцна адрозніваецца ад майго звычайнага. Знаходжуся тут другі дзень, я да такога распарадку ўжо прывык. У вольны час мы займаемся сваімі справамі: іграем на гітары, выконваем фізічныя практыкаванні, прыбіраем свае месцы. Я буду паступаць у Акадэмію МУС, таму вырашыў, што тыя веды, навыкі і ўменні, якія я тут атрымаю, дапамогуць мне ў далейшым», – расказаў хлопец.

bobrlife.by

 

Пры выкарыстанні матэрыялаў актыўная гіперспасылка на mogilev-region.gov.by абавязковая