На Магілёўшчыне актывісты БРСМ дапамагаюць ветэранам навесці парадак у дамах і на прысядзібных участках

У межах акцыі «Ветэран жыве побач» актывісты БРСМ на Магілёўшчыне наведваюць ветэранаў, удзельнікаў Вялікай Айчыннай вайны, блакаднікаў Ленінграда, каб аказаць ім канкрэтную дапамогу.

Учора моладзь, школьнікі і навучэнцы Жыліцкага сельскагаспадарчага каледжа працавалі ў вёсцы вілы Кіраўскага раёна, дзе пражывае Канстанцін Баранчук. У гады Вялікай Айчыннай Канстанцін Фёдаравіч дапамагаў партызанам, пасля вайны прымаў актыўны ўдзел у аднаўленні сельскай гаспадаркі.

– Цяпер наша чарга дапамагчы заслужанаму чалавеку, –гаворыць першы сакратар Кіраўскага райкама БРСМ Вікторыя Пеўняёва. – Хлопцы навялі парадак на тэрыторыі каля яго дома: высеклі зараснікі хмызняку, засыпалі падмытую дажджамі дарожку, выраўнялі і падсыпалі пяском ўчастак... Гэта самае малое, што мы можам зрабіць для людзей, якія падарылі нам мір. Дарэчы, мой прадзед прайшоў вайну, мае баявыя ўзнагароды. Яго ўжо няма з намі, але мне расказвалі пра яго мая мама, бабуля. Мы, сённяшняе пакаленне, павінны шанаваць і паважаць тых, хто набліжаў перамогу. Дапамагаць тым, хто побач, не забываць пра тых, хто пайшоў з жыцця…

На гэтым тыдні актывісты БРСМ з Кіраўска наведалі і блакадніцу Ленінграда. Галіне Бураковай у пачатку вайны было ўсяго 4 гады, яе сястры–3, малодшаму брату–крыху больш за год. Ён памёр у самым пачатку вайны. А яна з сям’ёй была эвакуіраваная з горада. Пасля жыла ў Ташкенце, адтуль перабралася на Магілёўшчыну ў Беларусь. Вось ужо больш за 20 гадоў Галіна Міхайлаўна, якая жыве ў вёсцы Букіна, лічыць сябе беларускай. Дапамога па гаспадарцы, вядома, ёй вельмі патрэбна. І моладзь пастаралася: прыбрала разрослы маліннік, пабяліла ўсе садовыя дрэвы, нанасіла дроў... І, з’язджаючы, абяцала вярнуцца: «Трэба яшчэ вымыць вам усе вокны ў хаце!»

На Кругляншчыне, у аграгарадку Філатава, працоўная моладзь і вучні Філатаўскай школы-сада прыйшлі да ветэрана Васіля Дзмітрыевіча Еўдакіменкі. Яму 101 год, прайшоў дзве вайны: савецка-фінскую і Вялікую Айчынную. Удзельнічаў у баях за Ленінград, змагаўся на Курскай дузе, на Варонежскім фронце, вызваляў Беларусь, быў чатыры разы паранены. І таму ведае цану жыцця, ведае, як гэта важна – захаваць мір, зберагчы тое, што дасягнута за пасляваенныя гады, а яшчэ – шанаваць і паважаць адзін аднаго. Таму вельмі ўдзячны хлопцам за тое, што напярэдадні Дня Перамогі дапамаглі яму навесці парадак каля дома, пафарбавалі плот.

– У Слаўгарадзе актывісты БРСМ наведалі ветэрана вайны Аляксандру Дамарацкую. І такіх адрасоў у нас яшчэ шмат. Акцыя «Ветэран жыве побач» не абмяжуецца 9 мая. Мы і да гэтага наведвалі нашых выдатных землякоў і будзем у далейшым дапамагаць ім усім, чым зможам, – рэзюмаваў першы сакратар Магілёўскага абкама БРСМ Уладзімір Паўлоўскі.

СБ, фото БРСМ