Найлепшыя аграрыі Магілёўшчыны пабывалі з экскурсіяй у Палацы Незалежнасці

Ажыятаж вакол Палаца Незалежнасці не спадае. Заяўкі на экскурсію штодня паступаюць ад дзясяткаў арганізацый і прадпрыемстваў, працоўных калектываў з усіх куткоў краіны. Пазіцыя кіраўніка дзяржавы такая: палац павінна наведаць як мага больш людзей. Экскурсіі праходзяць ледзь не кожны дзень. Менавіта таму тут так часта бываюць не толькі замежныя дэлегацыі, але і звычайныя беларусы. Сёння адзін з галоўных сімвалаў беларускай дзяржаўнасці і суверэнітэту расчыніў свае дзверы для найлепшых аграрыяў Магілёўскай вобласці, якія прыехалі са сваімі сем’ямі.

Па ўжо існуючай традыцыі экскурсія пачалася з Залы ўрачыстых цырымоній, дзе праходзяць найбольш знакавыя ўрачыстасці з удзелам нашага Прэзідэнта, атрымліваюць узнагароды найлепшыя выпускнікі, спартсмены і трэнеры, якія праслаўляюць Беларусь на ўвесь свет.

Госці з цікавасцю знаёміліся з выставачнай часткай праекта «Да Беларусі – з любоўю і пяшчотай», разглядалі залы, а яшчэ рабілі сотні кадраў на памяць у інтэр’ерах, якія да гэтага бачылі толькі па тэлевізары.

– Паездка ў Мінск для мяне і маёй сям’і стала сапраўдным падарункам за працу. Мы добра папрацавалі на ўборачнай, бо кожны з маіх калег разумеў, што ад нашага ўкладу залежыць, якім будзе будучы ўраджай. Таму мне ўдвая прыемней сёння тут знаходзіцца. Убачанае перасягнула ўсе самыя смелыя чаканні, – дзеліцца з журналістамі атрыманымі эмоцыямі Аляксандр Ярковіч. У Палац Незалежнасці працаўнік вёскі прыехаў з жонкай Любоўю і сынам Арцёмам.

Малодшы прадстаўнік сямейства Антон Ярковіч не скрывае: Зала ўрачыстых цырымоній уразіла больш за ўсё.

– Заўтра ў школе абавязкова раскажу аднакласнікам, дзе мне пашчасціла пабываць, пакажу фатаграфіі. Спадзяюся, пашчасціць пабываць тут яшчэ раз і не толькі на экскурсіі, – канстатуе суразмоўца.

Бацькам Арцёма запомнілася знакамітая Зялёная зала, якая без перабольшання мае сусветную вядомасць. Менавіта тут у 2015 годзе прайшла большая частка няпростых перагавораў «Нармандскай чацвёркі». Без перабольшання ўсе заходнія і еўрапейскія палітыкі думалі, што можна зрабіць для развязання вострай фазы канфлікту ў нашых паўднёвых суседзяў. Шмат працаваў і думаў над гэтым і Прэзідэнт нашай краіны. Не прапускае з-пад увагі сітуацыю, якая склалася, кіраўнік дзяржавы і сёння, робячы ўсё магчымае для ўрэгулявання сітуацыі, якая склалася ва Украіне.

З самымі яркімі і непаўторнымі эмоцыямі вернецца дадому сям’я Міхаіла і Алесі Дзёміных. На экскурсію муж і жонка прыехалі разам з дачкой. Прызнаюцца: прарабілі доўгі шлях з Крычаўскага раёна ў Мінск. Паездка стала магчымай дзякуючы намаганням кіраўніка сям’і, які паказаў адзін з найлепшых вынікаў на ўборачнай страдзе ў раёне:

– Усе мае працоўныя поспехі – заслуга кіраўніцтва нашага СВК і, вядома ж, сям’і. Жонка і дачка аказваюць не толькі маральную падтрымку, але і часам прымаюць непасрэдны ўдзел ва ўборачнай кампаніі. Магу сказаць, што яна прайшла на годным узроўні. Надвор’е і добрая сельгастэхніка спрыялі гэтаму.

Міхаіл Дзёмін падкрэслівае: паездка ў Палац Незалежнасці стала нечаканым, але прыемным сюрпрызам для ўсёй сям’і.

– Мы вельмі доўга чакалі гэтую экскурсію. Гэта вялікі гонар сюды патрапіць і вялікае шанцаванне. Уражанняў шмат, вочы разбягаюцца, не ведаеш, на што звяртаць увагу. Немагчыма нават падабраць словы, каб выказаць эмоцыі ад убачанага. Я рады, што нас сюды запрасілі. І ў першую чаргу хачу выказаць словы падзякі кіраўніку дзяржавы і ўсім датычным за магчымасць пабываць тут, – дзеляцца муж і жонка Дзёміны.

Дар’я Дзёміна дапаўняе бацькоў:

– Падчас экскурсіі нам расказалі, што Прэзідэнт штогод прымае на балі найлепшых студэнтаў і выпускнікоў нашай краіны. Каб трапіць сюды, трэба добра вучыцца. Паспрабую прыкласці ўсе намаганні, каб яшчэ раз прыехаць сюды і патанчыць на балі з нашым Прэзідэнтам.

Порцыю натхнення, гонару і жадання для новых працоўных здзяйсненняў атрымала сям’я Леаніда і Наталлі Сямёнавых. Не прамінулі муж і жонка зрабіць фота на памяць у зале ўручэння дзяржаўных узнагарод. Прычына таму простая: кажуць, калі зрабіць фота – абавязкова вернешся сюды, але ўжо для атрымання дзяржузнагароды. Гэтых слоў, дарэчы, ёсць і прамое пацверджанне. Літаральна пару месяцаў таму адна з узнагароджаных дзяржаўнай узнагародай расказала, што калісьці, робячы фота ў гэтай зале, загадала вярнуцца сюды, але ўжо па іншай нагодзе. Мара стала рэальнасцю.

– Уражвае, што залы гэтага палаца пабудаваныя беларускімі майстрамі і пераважна з айчынных матэрыялаў. Гэта выдатна, проста цудоўна! Мы вялікія малайцы! І вельмі выдатна і, на наш погляд, важна, што такія экскурсіі арганізоўваюць для простых беларусаў, – дзеляцца ўражаннямі жонка і муж Сямёнавы.

Падзеліцца эмоцыямі па прыездзе і іх дачка Марыя. Дзяўчынка вучыцца ў 8-м класе і марыць аб прафесіі ўрача.

– Аднакласнікі, калі даведаліся, што я паеду ў Палац Незалежнасці, вядома, парадаваліся за мяне. Заўтра абавязкова раскажу, якія выдатныя залы ўбачыла. І абавязкова сфатаграфуюся каля прыёмнай нашага Прэзідэнта, – канстатуе Дар’я, пасля чаго дапаўняе: – Зрабіла сэлфі ў зале дзяржузнагарод. Хто ведае, можа і мне пашчасціць пабываць тут у ліку ўзнагароджаных.

Экскурсія па Палацу Незалежнасці доўжылася больш за дзве гадзіны. На памяць з сабой удзельнікі павезлі нямала цікавых фактаў і прыгожых здымкаў.

СБ