Новая падстанцыя хуткай дапамогі пачала працу ў Бабруйску

Новая падстанцыя хуткай медыцынскай дапамогі пачала працу ў Бабруйску. Яна абслугоўвае 5 мікрараёнаў горада–каля 60 тыс.жыхароў.

«У Бабруйску вядзецца планамерная работа па паляпшэнні матэрыяльна-тэхнічнай базы ўстаноў аховы здароўя. Адным з важных прыкладаў такой працы стала адкрыццё падстанцыі № 1 хуткай дапамогі. Новы будынак выгадна размешчаны, боадсюль зручна дабірацца да пяці раёнаў, якія абслугоўвае падстанцыя, і дазваляе якасна і хутка аказваць дапамогу насельніцтву, – расказала галоўны ўрач Бабруйскай цэнтральнай бальніцы Аксана Крупеніч. – Гэта новы двухпавярховы будынак, з камфортнымі ўмовамі для працы і адпачынку персаналу».

У рамонце будынка, набыцці неабходнай мэблі і тэхнікі дапамаглі Бабруйскі гарвыканкам і завод буйнапанэльнага домабудавання. Будынак, у якім зараз размясцілася падстанцыя, раней належаў заводу ККД – гэта быў іх выставачны ўзор. За 14 дзён яго цалкам пераабсталявалі. У добраўпарадкаванні прылеглай тэрыторыі таксама дапамагалі спонсары.

За змену тут занята 5 брыгад. У сярэднім гэта 17 чалавек. Усяго на падстанцыі хуткай медыцынскай дапамогі 61 супрацоўнік. У аўтапарку – 5 аўтамабіляў. «Усе выклікі паступаюць дыспетчарам на цэнтральнай падстанцыі, адкуль размяркоўваюцца на астатнія – у залежнасці ад таго, у якім раёне чалавеку спатрэбілася дапамога, – расказала ўрач хуткай медыцынскай дапамогі (загадчыца падстанцыі № 1) Ганна Мяцеліца. – У склад брыгады ўваходзяць два фельчары».

«Падчас адкрыцця нам падарылі сертыфікат на набыццё чатырох новых аўтамабіляў хуткай дапамогі. У найбліжэйшы час адновім аўтапарк», – падзялілася Аксана Крупеніч.

Усяго ў Бабруйску тры падстанцыі хуткай медыцынскай дапамогі, якія абслугоўваюць больш за 230 тыс. жыхароў горада і раёна. Месцазнаходжанне падстанцый абрана не выпадкова: яны размеркаваныя так, каб брыгада магла своечасова прыбыць на выклік.

БЕЛТА