Дзякуючы прэферэнцыям для паўднёвага ўсходу Магілёўскай вобласці з 2015 года створана амаль 3 тыс. новых працоўных месцаў. Такой думкай з журналістамі падзяліўся прэм'ер-міністр Беларусі Раман Галоўчанка падчас наведвання Слаўгарадскага раёна.
«Праграма сацыяльна-эканамічнага развіцця паўднёва-ўсходняга рэгіёна Магілёўскай вобласці рэалізуецца з 2015 года, - адзначыў Раман Галоўчанка. - Два з паловай гады таму яна была актуалізаваная, таму што меры, якія першапачаткова закладваліся пры яе фармаванні, вычарпалі сябе і не даюць жаданага эфекту. Пакет ільгот быў дастаткова істотным - пачынаючы ад падаходнага падатку і заканчваючы шэрагам іншых прэферэнцый. За пяцігодку ўсё, што магло быць скарыстана ці выціснута з гэтых умоў, адбылося. Мы правялі пэўны мазгавы штурм і ўнеслі прапановы, як можна зрабіць яшчэ больш прывабныя ўмовы менавіта для вытворчых укладанняў».
Прэм'ер-міністр падкрэсліў, што сёння нельга гаварыць аб тым, што ў праграмы не было эфекту: ён не толькі быў, але і прадаўжае дзейнічаць. Так, за перыяд рэалізацыі праграмы з 2015 года створана 290 новых камерцыйных арганізацый і 2,9 тыс. новых працоўных месцаў, пабудавана значная колькасць жылля. Нягледзячы на ўсе льготы, многім арганізацыям было складана прыцягваць крэдытныя рэсурсы нават па тых умовах, якія былі прадугледжаны праграмай: іх трэба было ўсё роўна вяртаць, у тым ліку адбіраць з абароту грошы. Плюс да ўсяго некаторыя праекты нібы замарозіліся на стадыі рэалізацыі, таму што не было стымулу іх дабудоўваць і выводзіць на праектную магутнасць. Патрэбны былі шляхі вырашэння.
«Сумесна з Банкам развіцця Беларусі быў прапанаваны і рэалізаваны такі эксперымент, што мы не проста субсідуем працэнтную стаўку па крэдытах, а канкрэтна з бюджэту робім трансфер тым, хто ўклаў грошы, не важна, уласныя або прыцягнутыя, - падкрэсліў Раман Галоўчанка. - 20% гэтых сродкаў вяртаецца кэшбэкам па меры будаўніцтва прадпрыемства, яшчэ 15% – на працягу трох гадоў пасля выхаду на праектную магутнасць роўнымі долямі. Такім чынам, агульны бюджэтны трансфер складае 35 працэнтаў, якія вяртаюцца назад на развіццё вытворчасці. Менавіта па гэтай схеме ў Слаўгарадзе рэалізуюцца праекты па выпуску мармеладу «Чырвонага харчавіка» і сыру «Бабулінага гладыша». Патэнцыял у гэтай схемы дастаткова вялікі, ільготны пакет паўднёвага ўсходу Магілёўшчыны яшчэ сябе не вычарпаў».
Па словах прэм'ер-міністра, што да бюджэтных укладанняў, то яны ёсць, як і ў любым іншым рэгіёне: «Калі казаць пра паўднёвы ўсход Магілёўшчыны, то бюджэтнае фінансаванне накіроўваецца галоўным чынам на ўмацаванне матэрыяльнай базы сельскай гаспадаркі. Гэта не гіганцкія грошы - каля Br70 млн укладзена на працягу ўсёй праграмы. У гэтым годзе на гэтыя мэты прадугледжваецца каля Br8 млн. Рэгіён няпросты, бо наступствы Чарнобыльскай катастрофы да гэтага часу даюць аб сабе ведаць, таму дзяржава гэтым рэгіёнам дапамагае. І мы бачым, што людзі гэта шануюць».
БЕЛТА
