Рус Бел Eng 中文

Расейцы, немцы, кітайцы. Хто яшчэ купляе мсціслаўскія сыры на сусветным рынку

Геаграфія продажу прадукцыі ААТ «Бабушкина крынка» распаўсюджваецца далёка за межы Беларусі. Яе ведаюць у Расійскай Федэрацыі, Украіне, Казахстане, Германіі, Кітаі і іншых краінах. Кампанія пастаянна пашырае геаграфію паставак, асартымент тавараў, вытворчыя магутнасці.

ААТ «Бабушкина крынка» – найбуйнейшы беларускі вытворца малочнай прадукцыі. Холдынг з’яўляецца лідарам па колькасці перапрацаванай экалагічна чыстай сыравіны. Брэнд холдынгу вядомы і ўвасабляе беларускую якасць на міжнародным рынку. Уклад ва ўстойлівае развіццё ўносіць працоўны калектыў філіяла «Мсціслаўскі». Яго колькасць складае 260 чалавек.

За 9 месяцаў 2021 года на прадпрыемстве перапрацавалі 38867 тон малака. Вытворчасць цвёрдых і паўцвёрдых сыроў склала 3306 тон, плаўленага сыру – 61 тону. Прадукцыйнасць працы ў параўнанні з папярэднім годам павялічылася на 9,2%, вытворчасць таварнай прадукцыі ў дзейных коштах – на 16,35%. За 2021 год асвоены выпуск больш за 20 назваў цвёрдых сыроў.

Работнікі прадпрыемства ганарацца сваім прадпрыемствам, якое стабільна развіваецца. Яго сацыяльная арыентаванасць дазваляе з упэўненасцю глядзець у будучыню.

Адна з тых, хто на працягу дзясяткаў гадоў верны прадпрыемству, – Алена Глазкова. Яна пачала працаваць на Мсціслаўскім малаказаводзе ў 1990 годзе. Шмат гадоў яна была майстрам-вытворцам у цэху натуральнамалочнай прадукцыі, майстрам змены.

У цяперашні час Алена Анатольеўна працуе прыёмшчыцай малака.

Штодня на прадпрыемства яго паступае каля 200 тон. Дастаўку малака на прадпрыемства з Крычаўскага, Хоцімскага і Клімавіцкага раёнаў ажыццяўляе каля 40 аўтамабіляў. Прадукцыю трэба прыняць, узважыць, апрыходаваць, аформіць адпаведную дакументацыю.

– Час уносіць змены ў працу завода, – гаворыць Алена Глазкова. – У цяперашні час многія працэсы камп’ютарызаваны. На маніторы бачныя вынікі лабараторных аналізаў, вага малака, якое прымаю. Нават каб выкатаць малако з цыстэрны, дастаткова націску кнопкі мышы.

Прыёмшчыца малака хіба што ўручную запаўняе дакументы.

Асаблівая ўвага надаецца выкананню санітарных патрабаванняў. Тэхналагічнае абсталяванне, памяшканне, дзе вырабляецца прыёмка малака, патрабуе дбайнай уборкі і дэзынфекцыі. Частковае выкананне гэтай працы таксама ўваходзіць у абавязкі прыёмшчыцы малака.

Алена Анатольеўна любіць сваё прадпрыемства, калектыў. Яна ганарыцца тым, што яе працоўная біяграфія звязана з філіялам «Мсціслаўскі» ААТ «Бабушкина крынка». Тут яна адбылася як прафесіянал сваёй справы, заслужыла аўтарытэт у маладых калег, павагу кіраўніцтва. За гады працы яна ўзнагароджана ганаровымі граматамі і падзякамі.

 mstlife.by

Пры выкарыстанні матэрыялаў актыўная гіперспасылка на mogilev-region.gov.by абавязковая