Сяргей Новікаў: спадзяюся, людзі падтрымаюць мой прыклад і прыйдуць на выбарчыя ўчасткі

Ледзь участак для галасавання, размешчаны ў Магілёўскай школе № 6, пачаў працу, на парозе з’явіўся Сяргей Новікаў – сярэбраны прызёр Алімпійскіх гульняў у Ванкуверы, начальнік упраўлення спорту і турызму Магілёўскага аблвыканкама.

«Наш славуты спартсмен прыйшоў», – з усмешкай сустракаюць біятланіста члены выбарчай камісіі і ўжо па памяці называюць яго хатні адрас, на ўсялякі выпадак звяраючыся з пашпартам візіцёра. Справа ў тым, што Сяргей Валянцінавіч заўсёды адным з першых выконвае свой грамадзянскі абавязак.

– У асноўны дзень галасавання планую выехаць за тэрыторыю Магілёўскай вобласці, таму вырашыў прагаласаваць загадзя, каб не застацца ў баку ад гэтай найважнейшай грамадска-палітычнай падзеі, – гаворыць ён. – Спадзяюся, што ўсе, хто дасягнуў паўналецця, падтрымаюць маё пачынанне. У зручны час прыйдуць на выбарчыя ўчасткі і выкажуць сваё меркаванне, папярэдне азнаёміўшыся і паглыбіўшыся ў прапанаваныя змены Канстытуцыі.

Па словах Сяргея Новікава, ён галасаваў за мір, за стабільнасць, за захаванне гістарычнай памяці. За тое, каб Беларусь працягвала ісці сваім шляхам, квітнела і развівалася:

– Мне імпануе, што, згодна з новым праектам Асноўнага Закона, адным з органаў функцыянавання краіны ўводзіцца УНС, у які будуць абірацца прадстаўнікі ўсіх слаёў і катэгорый грамадства. Менавіта ўрачы, аграрыі, спартсмены, завадчане і іншыя беларусы, у залежнасці ад сваёй сферы дзейнасці, будуць уносіць прапановы і вызначаць далейшы курс развіцця Беларусі.

Усяго ж на ўчастку для галасавання № 109, які знаходзіцца ў досыць спакойным спальным раёне, лічыцца больш за 1400 выбаршчыкаў.

– Па першым дні цяжка прадказаць, наколькі актыўна людзі будуць карыстацца гэтай магчымасцю галасаваць датэрмінова, – гаворыць старшыня ўчастковай выбарчай камісіі па рэферэндуме ўчастка для галасавання № 109 Алена Белавешкіна. – Але па вопыце мінулых гадоў скажу, што заўсёды знаходзяцца тыя, хто працуе ў асноўны дзень галасавання, або з’язджае куды-небудзь, або проста не любіць вялікага скаплення людзей.

Дарэчы, датэрміновае галасаванне тут праходзіць у невялікім кабінеце адразу каля ўваходу ў школу, паколькі адначасовы вялікі наплыў наведвальнікаў не чакаецца. А вось 27 лютага арганізуюць галасаванне ў спартзале, дзе прасторней.

– Паставім тры кабіны, адну з якіх спецыяльна абсталюем для людзей з абмежаванымі магчымасцямі, – кажа Алена Мікалаеўна. – Яна шырэйшая, а значыць спакойна праедзе каляска. Таксама ўнутры паставім больш нізкі стол і побач крэсла для тых, каму цяжка стаяць. На ўваходную групу будынка дадаткова ўстановім званок, каб інваліды маглі выклікаць дзяжурных валанцёраў і папрасіць дапамогу. Для слабавідушчых выбаршчыкаў падрыхтавалі лупу і нават трафарэты для бюлетэняў са шрыфтам Брайля.

Распрацаваны алгарытм дзеянняў і на выпадак, калі галасаваць прыйдзе чалавек з ID-картай або біяметрычным пашпартам:

– У пашпартна-візавай службе нашага Кастрычніцкага раёна Магілёва арганізавана дзяжурства спецыялістаў, з якімі мы будзем трымаць сувязь: тэлефанаваць, называць даныя і атрымліваць пацверджанне інфармацыі. Акрамя таго, на нашым участку выкананы ўсе санітарна-супрацьэпідэмічныя меры, у абавязковым парадку дзяжурыць супрацоўнік міліцыі, забяспечваючы ахову ўчастка і бюлетэняў.

СБ