01.02.2021 - 11:46

У нядзелю, 31 студзеня, у службу МНС ад відавочцы паступіла трывожнае паведамленне аб тым, што ў раёне гарадскога пляжа ракі Днепр па вул. Правабярэжнай у Магілёве чалавек праваліўся пад лёд, таўшчыня якога каля 3 см, паведаміла старшы інспектар абласнога ўпраўлення МНС Вольга Нехарошых.

Магілёвец быў выратаваны манеўрана-пошукавай групай ОСВОДа да прыбыцця ратавальнікаў. 35-гадовы мужчына з дыягназам «гіпатэрмія» шпіталізаваны ў рэанімацыйнае аддзяленне бальніцы.

«Бяспечным для чалавека лічыцца лёд таўшчынёй не менш за 10 см, – распавяла суразмоўца. – Выхад на лёд падчас яго раставання – бясспрэчная рызыка. І прыраўняць такую бясстрашнасць людзей можна хутчэй да безадказнасці, чым да смеласці. Ці не занадта высокая стаўка, бо на шалях заўсёды чалавечае жыццё».

Дарэчы, трываласць лёду можна вызначыць візуальна: лёд блакітнага колеру – трывалы, белага – трываласць яго ў 2 разы меншая, матава-белы або з жаўтлявым адценнем – ненадзейны. Ведаць пра гэта павінен кожны школьнік, не кажучы ўжо пра дарослых аматараў парыбачыць. Тым не менш з года ў год сітуацыя не змяняецца – пад лёд правальваюцца і тонуць дзясяткі чалавек.

Што рабіць, калі Вы праваліліся ў халодную ваду:

  • Не панікуйце, не рабіце рэзкіх рухаў, захавайце дыханне.
  • Раскіньце рукі ў бакі і паспрабуйце зачапіцца за край лёду, надаўшы целу гарызантальнае становішча.
  • Паспрабуйце асцярожна налегчы грудзьмі на край лёду і закінуць адну, а потым і другую нагу на лёд.
  • Калі лёд вытрымаў, перакочваючыся, павольна паўзіце у той бок, адкуль прыйшлі, бо тут лёд ужо правераны на трываласць.

Рэд.