Уладальнікам «Залатой маскі» на форуме «М@rt.Кантакт» стаў спектакль Палескага драмтэатра

Спектакль «Вій» Палескага драматычнага тэатра стаў уладальнікам «Залатой маскі» – галоўнага прыза Міжнароднага маладзёжнага тэатральнага форума «М@rt.Кантакт» у Магілёве.

Вынікі форума агучаны старшынёй экспертнай рады «М@rt.Кантакта», актрысай тэатра і кіно, заслужанай артысткай Расіі Аленай Барзовай. «Тэатр – гэта магія, – сказала яна. – Гэта калі мы разумеем, што на сцэне адбываецца цуд, які немагчыма растлумачыць словамі, і апускаемся ў яго, цалкам аддаючы сваю душу. І табе аддаюць са сцэны сваю душу – адбываецца той самы кантакт. І гэта, мусіць, сапраўдны тэатр з вялікай літары».

Найлепшым спектаклем форума стаў «Вій» Палескага драматычнага тэатра. Як адзначыла Алена Барзова, у ім выйшла на сцэну ўсяго 6 выканаўцаў, якія стварылі адчуванне цэлага аркестра. «Гэта ўнікальнае і неверагоднае відовішча», – адгукнулася яна аб хароры ў двух дзеяннях па матывах аповесці Мікалая Гогаля «Вій».

Акрамя галоўнага прыза, экспертны савет прысудзіў спецыяльныя дыпломы. Адзін з іх дастаўся артысту мінскага Тэатра-студыі кінаакцёра Уладзіміру Мішчанчуку за вернасць традыцыям псіхалагічнага тэатра, а таксама ўнікальнае ўвасабленне вобраза дырыжора Мілера ў спектаклі «Фальшывая нота». Другі – спектаклю «Варшаўская мелодыя» Новага драматычнага тэатра (Мінск) за дакладнасць раскрыцця драматычных вобразаў і выразнае рэжысёрскае рашэнне.

Прыз глядацкіх сімпатый прысуджаны спектаклю «Княжна Мэры» мінскага тэатра «ТрыТфармаТ». Найлепшым спектаклем форума, паводле версіі маладзёжнага журы, стала гісторыя кахання «Варшаўская мелодыя». Тут адзначана цудоўная акцёрская і рэжысёрская работа.

«Было вялікім задавальненнем усе гэтыя дні бачыць, адчуваць, суперажываць, разумець, думаць, – сказала старшыня моладзевага журы Аліна Клімянкова. – Гэта ўсё тыя эмоцыі, якія павінен выклікаць у нас тэатр. Гэта тое, што робіць нас жывымі і сапраўднымі. Вядома ж, было вельмі складана зрабіць выбар, бо прадстаўлена шмат спектакляў. Яны ўсе абсалютна розныя, усе індывідуальныя, асаблівыя і ўнікальныя».

«М@rt.Кантакт» як праява мастацтва сапраўды надоўга пасяліўся на магілёўскай зямлі, – адзначыў падчас цырымоніі закрыцця форума намеснік старшыні Магілёўскага аблвыканкама Валерый Малашка. – Сёння глядзельная зала і яе апладысменты паказалі, што тэатр жывы і цікавы. Таму мы дзякуем усім тэатрам, якія адгукнуліся на нашу прапанову і прынялі ўдзел у гэтай падзеі. Запрашаем усіх праз год на 16-ы «М@rt.Кантакт».

Асобную падзяку Валерый Малашка выказаў калектыву Магілёўскага абласнога драматычнага тэатра, які ўсё зрабіў для таго, каб гэты фестываль адбыўся. Ён уручыў установе культуры ганаровую грамату Магілёўскага аблвыканкама. Ва ўрачыстай абстаноўцы ўзнагароду атрымала дырэктар Ірына Белякова. У сваю чаргу яна адзначыла высокую актыўнасць тэатральнай публікі: «Вялікі дзякуй усім гледачам, таму што нашы залы падчас правядзення спектакляў былі поўныя. Дзякуй за вашы эмоцыі і бурныя апладысменты. Усе ўдзельнікі проста шчаслівыя менавіта дзякуючы вам».

БЕЛТА