Урачысты прыём, прысвечаны Дню жанчын, адбыўся ў Магілёўскім аблвыканкаме

Урачысты прыём, прысвечаны Дню жанчын, адбыўся ў Магілёўскім аблвыканкаме. У мерапрыемстве прынялі ўдзел 29 жанчын з гарадоў і раёнаў рэгіёна – розных узростаў і прафесій, якія зарэкамендавалі сябе як выдатныя спецыялісты і выдатныя мамы.

Віншуючы ўдзельніц сустрэчы, а ў іх асобе ўсіх жанчын Прыдняпроўскага краю, старшыня Магілёўскага аблвыканкама Анатоль Ісачанка адзначыў, што няма такой сферы, дзе прадстаўніцы прыгожай паловы нашага грамадства не адыгрывалі б актыўную ролю.

«Мне выпала вельмі прыемная місія – ад імя ўсіх мужчын Магілёўшчыны павіншаваць вас з цудоўным вясеннім святам – Днём жанчын!

Кожная з вас вартая шчырага захаплення. Вы заўсёды былі і застаяцеся надзейнай апорай у вырашэнні нашых агульных задач па развіцці рэгіёна і ўсёй краіны, – падкрэсліў губернатар. – Нейкім неверагодным чынам у вас атрымліваецца ўсё паспяваць: берагчы хатнюю ўтульнасць, дасягаць значных поспехаў у працы ці вучобе. Нашы жанчыны паспяхова працуюць ва ўсіх галінах эканомікі і пры гэтым заўсёды застаюцца чароўнымі, прыгожымі і жаноцкімі. Але галоўная іх місія – дарыць жыццё, быць маці. Гэта самая адказная, няпростая, але самая высакародная праца.

Дзякуючы пазіцыі нашага Прэзідэнта, падтрымка мацярынства і сям’і – гэта аснова сацыяльнай палітыкі дзяржавы. Таму што выхаваць траіх, пяцярых і больш дзяцей – гэта подзвіг. А кожная шматдзетная мама – гонар Магілёўскай вобласці, усёй краіны.

Сёлета ўжо 10 жыхарак Прыдняпроўскага краю, якія нарадзілі і выхавалі пяцярых і больш дзяцей, указам кіраўніка дзяржавы ўдастоены ордэна Маці. Чацвёра з іх сёння сярод нас у гэтай зале».

Усяго ордэнам Маці ўзнагароджана 1367 шматдзетных маці, у тым ліку ў 2021 годзе – 164.

У Магілёўскай вобласці расце колькасць шматдзетных сем’яў. Сёння ў рэгіёне пражывае амаль 11,8 тыс. такіх сем’яў. Яшчэ шэсць гадоў таму гэта лічба была на 3,5 тыс. меншай.

Паводле звестак Магілёўскага абласнога ўпраўлення Фонду сацыяльнай абароны насельніцтва Міністэрства працы і сацыяльнай абароны Рэспублікі Беларусь у рэгіёне дзяржаўныя дапамогі выплачваюцца на 42,6 тыс. дзяцей, за 2021 год на гэтыя мэты накіравана больш за Br221,1 млн.

«Усебаковая падтрымка сем’яў з дзецьмі – адзін з найважнейшых прыярытэтаў сацыяльнай палітыкі нашай краіны. Так, заканадаўствам прадугледжана 11 відаў дзяржаўных дапамог, прымяняюцца таксама дадатковыя меры для стымулявання нараджальнасці. Сярод іх прызначэнне сямейнага капіталу пры нараджэнні трэцяга і наступных дзяцей, – падкрэсліў Анатоль Ісачанка. – З 2015 года на Магілёўшчыне сямейны капітал прызначаны звыш 11,6 тыс. сем’ям. З 2020 года датэрмінова распарадзіліся сродкамі сямейнага капіталу 4853 сям’і. Шматдзетным сем’ям таксама аказваецца дзяржаўная падтрымка пры будаўніцтве жылля. Летась звыш 1100 сем’яў палепшылі свае жыллёвыя ўмовы. Сёлета яшчэ столькі ж сем’яў павінны стаць уладальнікамі ўласнага жылля.

Як бачым, у нашай краіне робіцца ўсё, каб жанчыны і іх сем’і аддавалі больш увагі выхаванню дзяцей, адчувалі сябе абароненымі і былі ўпэўненыя ў заўтрашнім дні. Справа застаецца толькі за вамі!»

У завяршэнне сваёй прамовы старшыня аблвыканкама пажадаў прадстаўніцам прыгожай паловы чалавецтва моцнага здароўя, вясновага настрою, яркіх уражанняў, выканання запаветных жаданняў, міру і дабра. Чатыром з іх, якія нарадзілі і выхоўваюць па пяць дзяцей, ён уручыў ордэны Маці.

Сярод узнагароджаных – жыхарка Бялыніцкага раёна Таццяна Куляшова.

«У мяне пяць дзетак – старэйшая дачка і чатыры сыночкі. Я сама расла ў вялікай сям’і, у маёй мамы было 6 дзяцей – пароўну хлопчыкаў і дзяўчынак. Мы заўсёды жылі дружна, любілі і падтрымлівалі адно аднаго. Таму і я хацела вялікую сям’ю. Сям’я – гэта мая апора. Вельмі хачу яшчэ адну дачку – падзялілася жанчына. – Хвалююча сёння атрымліваць узнагароду, але і вельмі прыемна, што дзяржава надае шматдзетным сем’ям так шмат увагі. Напярэдадні свята я хачу пажадаць усім жанчынам здароўя ім самім, іх дзецям і блізкім, а таксама – мірнага неба над галавой».

Яшчэ адной з уладальніц высокай узнагароды стала хатняя гаспадыня Алеся Кавалёва з Клічаўскага раёна.

«Я маці пяці дзяцей. Старэйшаму сыну ўжо 17, самаму малодшаму – 1,7 года. Я аддаю ім усю сваю любоў і клопат, без якіх выхаванне ўявіць немагчыма, – падзялілася шматдзетная мама. – Для любой жанчыны, а тым больш мамы, самае важнае, каб дзеці і ўсе блізкія былі здаровыя. Гэтага і хочацца пажадаць усім. А яшчэ – цярпення і дабрабыту. Усім беларусам цяпер хочацца пажадаць міру і спакою.

І падзякаваць дзяржаве за падтрымку. Для нас яна адчувальная і каштоўная. І вельмі прыемна, што на такім высокім узроўні шматдзетных мам адзначылі, уручылі нам узнагароды».

Узнагароды ўдастоеныя таксама швачка вытворчага ўнітарнага прадпрыемства «Славянка-Глуша» Бабруйскага раёна Святлана Дубатоўка і работніца ўнітарнага камунальнага прадпрыемства «Жылкамгас» Клічаўскага раёна Святлана Янкоўская.

Юлiя Таранава, фота Галiны Гаўрыловiч