Віктар Лісковіч: вытворчы турызм дапаможа школьнікам свядома выбіраць будучую прафесію

Старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці, намеснік старшыні Нацыянальнай камісіі па правах дзіцяці Віктар Лісковіч сёння з рабочай паездкай знаходзіцца ў Магілёве.

Першым пунктам яго маршруту стаў Беларускі дзяржаўны ўніверсітэт харчовых і хімічных тэхналогій, які яшчэ ўчора насіў назву Магілёўскі дзяржаўны ўніверсітэт харчавання. Для госця тут правялі экскурсію па вучэбных лабараторыям і арганізавалі майстар-класы.

Залаты прызёр IV Рэспубліканскага конкурсу прафесійнага майстэрства «WorldSkillsBelarus 2020» у кампетэнцыі «Хлебапячэнне» Юлія Рашкевіч, якая займаецца выпечкай з 10 гадоў, прыгатавала заправы і пляцёнкі з карыцай. А Міхаіл Кузьміч парадаваў салатай з ласосем «Гравлакс» і агароднінным рататуем.

– Першапачаткова я хацеў паступаць у Акадэмію МУС, але праваліў медкамісію, – расказвае студэнт чацвёртага курса. – Тады скарыстаўся сваім запасным планам і цяпер вучуся на повара, аб чым ні разу не пашкадаваў. Вельмі люблю французскую кулінарыю і мадэрнісцкую кухню, чытаю шмат літаратуры ў сетцы, падпісаны на тэматычныя паблікі, але больш за ўсё, вядома, удасканальваць майстэрства дапамагае працэс навучання ва ўніверсітэце. Хутка атрымаю дыплом і, упэўнены, тады канчаткова звяжу сваё жыццё з грамадскім харчаваннем.

Таксама Віктар Лісковіч стаў удзельнікам адкрытага дыялогу «Маладзёжны парламентарызм: новыя кропкі росту». Мерапрыемства сабрала больш за 50 чалавек: прадстаўнікоў органаў улады, членаў Моладзевага савета (парламента) пры Нацыянальным Сходзе Рэспублікі Беларусь ад Магілёўскай вобласці, прадстаўнікоў Моладзевага парламента пры Магілёўскім абласным Савеце дэпутатаў. Яны дзяліліся напрацоўкамі, вопытам, уражаннямі.

Моладзь – будучыня краіны, праз нейкі час маладое пакаленне будзе займаць у тым ліку кіруючыя пасады і накіроўваць краіну да далейшага росквіту, лічыць старшыня моладзевага парламента пры Магілёўскім абласным Савеце дэпутатаў Мікалай Неўмяржыцкі:

– Таму так важна ўжо цяпер прыцягваць іх да ўдзелу ў грамадска-палітычным жыцці краіны, абмеркаванню законапраектаў. А адкрытыя дыялогі – вельмі зручны і прадуктыўны фармат працы. Яны дапамагаюць збіраць розныя ідэі і ініцыятывы, каб затым ўвасабляць іх у жыццё, бо мы з’яўляемся свайго роду мостам паміж моладдзю і выканаўчымі органамі ўлады.

Канкрэтнымі паспяховымі прыкладамі падзялілася намеснік дырэктара Круглянскага КПК «Жылкамгас» Вікторыя Кароткая:

– Моладзь нашага раёна на дабрачыннай аснове добраўпарадкавала некалькі дзіцячых гульнявых пляцовак. Таксама ўлады раёна падтрымалі іншую нашу ініцыятыву, і ў гарадскім парку культуры і адпачынку абсталявалі варкаўт-пляцоўку, якая карыстаецца вялікай папулярнасцю. Наогул у нас вельмі шмат ідэй, якія, я ўпэўненая, таксама стануць рэальнасцю.

Дарэчы, на некаторых удзельніцах дыялогу Лісковіч заўважыў брошкі ў выглядзе сэрцайка з выявай беларускага флага, зробленыя майстрам з Гомеля. Упрыгожванне так спадабалася госцю, што ён прапанаваў зрабіць іх брэндам і фішкай Парламента. Але ўдакладніў, што для дзяўчат: «А хлопцам што-небудзь іншае прыдумаем».

– Сустрэчы з моладдзю – адна з формаў яе ўключэння ў парламентарызм, – падвёў вынікі Віктар Лісковіч. – У яе ёсць шмат пажаданняў і прапаноў, мы павінны даць ім магчымасць для развіцця, самарэалізацыі – не важна, у якім кірунку. Тады маладыя людзі будуць адчуваць сябе патрэбнымі, карыснымі, запатрабаванымі, а ў канчатковым выніку ўсё гэта зробіць нашу краіну яшчэ мацней.

Расказаў Віктар Андрэевіч і пра арыенціры ў сістэме адукацыі Беларусі на будучыню:

– Самае галоўнае, каб дзіця, скончыўшы школу, свядома выбрала будучую прафесію. Не па колькасці набраных на ЦТ балаў, а тую, якая будзе яго радаваць, што станоўча адаб’ецца на якасці працы. Мы ж павінны ў гэтым дапамагаць. Я кажу аб вытворчым турызме ў школьныя гады, каб вучні наведвалі прадпрыемствы свайго рэгіёна, краіны, азнаёміліся з прафесіямі. Будуць яны наведваць і воінскія часткі, каб убачыць побыт і ўмовы службы. Так у дзяцей сфармуецца патрэбнасць у той ці іншай спецыяльнасці. Акрамя таго, трэба ведаць месцы гісторыка-культурнай спадчыны. Усё гэта сфармуе маладога грамадзяніна-патрыёта, які будзе разумець выразна, што ён патрэбна краіне.

Пасля адкрытага дыялогу адбылося ўскладанне кветак да брацкай магілы савецкіх воінаў на праспекце Шміта. Таксама госць наведаў ААТ «Магілёўхімвалакно» і «Тэлерадыёкампанію ”Магілёў”».

СБ, фота Галіны Гаўрыловіч