У 2010 годзе ў Быхаўскім раёне Магілёўскай вобласці – на маляўнічым беразе Чыгірынскага вадасховішча – стартаваў праект «Вялікая бард-рыбалка». За ўсе мінулыя гады ён ператварыўся ў міжнародную падзею, аналагаў якой няма ў СНД, а магчыма, і ў свеце.
Свята, якое на працягу некалькіх дзён праходзіць пад адкрытым небам, аб’ядноўвае музыку, спорт, экатурызм, актыўны адпачынак.
Па традыцыі ў межах «Вялікай бард-рыбалкі» праводзяцца канцэрты бардаўскай песні, інструментальнай музыкі і класічнай гітары, конкурс аўтарскай песні «Гітара па крузе», рыбалоўныя спаборніцтвы і майстар-класы, адкрыты чэмпіянат Беларусі па прыгатаванні юшкі, лазневае свята, кірмаш здароўя. Кожны год у праграме з’яўляюцца новыя праекты і мерапрыемствы.
Пражыванне арганізавана ў палатачных лагерах на беразе Чыгірынскага вадасховішча, а таксама ў мясцовых базах адпачынку і аграсядзібах вёскі Грудзічына Быхаўскага раёна. На «Вялікай бард-рыбалцы» арганізуецца спецыяльны лагер для караванераў. На свяце кругласутачна працуюць гандлёвыя кропкі.
