У Беларусі выздаравелі і выпісаны 2072 пацыенты з пацверджаным COVID-19
У Беларусі на 29 красавіка выздаравелі і выпісаны 2072 пацыенты, у якіх раней быў пацверджаны дыягназ COVID-19. Аб гэтым паведамілі ў прэс-службе Міністэрства аховы здароўя. Зарэгістраваны 13181 чалавек са станоўчым тэстам на COVID-19, што складае 7,8 працэнта ад колькасці праведзеных тэстаў. Усяго праведзена 168 986 тэстаў. За ўвесь перыяд распаўсюджвання інфекцыі на тэрыторыі краіны памерлі 84 пацыенты з шэрагам хранічных захворванняў з выяўленай каранавіруснай інфекцыяй. БЕЛТА
Міністэрства аховы здароўя распрацавала памятку для пацыентаў з бессімптомным або лёгкім ходам захворвання на COVID-19
Міністэрства аховы здароўя распрацавала памятку для пацыентаў, якія знаходзяцца дома ў сувязі з бессімптомным або лёгкім ходам COVID-19.
Дзяржэкзамены ў МДУ імя А. А. Куляшова праходзяць з улікам мер па захаванні здароўя студэнтаў і педагогаў
З захаваннем усіх рэкамендацый санітарна-эпідэміялагічных службаў, улікам забеспячэння санітарна-эпідэміялагічнага дабрабыту студэнтаў і выкладчыкаў у МДУ імя А. А. Куляшова на гэтым тыдні праходзяць дзяржаўныя экзамены. Атэстат прафесійнай сталасці неўзабаве атрымае больш за 200 студэнтаў факультэта педагогікі і псіхалогіі дзяцінства–лагапеды, спецыялісты дашкольнай адукацыі, псіхолагі, як паведамілі ў ВНУ.
Гуманітарная дапамога з Кітая і Узбекістана прыбыла ў Магілёў
У Магілёў прыбыла гуманітарная дапамога з КНР і Узбекістана. Гэта больш за 10 тыс. медыцынскіх масак і пальчатак, 1 тыс. рэспіратараў, 500 ахоўных камбінезонаў. Таксама медыкі атрымалі 600 пульсаксіметраў. Лічбавы гаджэт здольны за лічаныя секунды паказаць пульс і насычэнне кіслародам крыві ў арганізме чалавека. Партыя гуманітарнага грузу ўжо накіравана ў Магілёўскую цэнтральную паліклініку. На працягу двух сутак сродкі індывідуальнай абароны атрымаюць многія медыцынскія ўстановы вобласці.
«Каранавірус можна перамагчы»: інтэрв’ю першай выздаравелай ад COVID-19 жыхаркі Магілёўскай вобласці
«Гэта ўсяго толькі вірус», – першая пераможца COVID-19 жыхарка Магілёўскай вобласці дала інтэрв’ю тэлеканалу «Беларусь 4 “Магілёў”». Ірына расказала, што ў барацьбе з хваробай ёй вельмі дапамаглі падтрымка родных і прафесіяналізм дзеянні медыкаў. ТРК «Магілёў»
Міністэрства аховы здароўя: захворванне COVID-19 павінна зніжацца ў найбліжэйшыя 3–4 тыдні
Захворванне COVID-19 павінна зніжацца ў найбліжэйшыя 3–4 тыдні, – заявіла намеснік міністра – галоўны дзяржаўны санітарны ўрач Беларусі Наталля Жукава ў інтэрв’ю праграме «Контуры» на тэлеканале АНТ. «На працягу 2–3 тыдняў сітуацыя не скончыцца, мы будзем у эпідпрацэсе. Але хацела б адзначыць, што сітуацыя пад кантролем. Ёсць перадумовы меркаваць, што захворванне павінна зніжацца ў найбліжэйшыя 3–4 тыдні», – адзначыла Наталля Жукава.
Сталі вядомыя падрабязнасці ўказа аб надбаўках медыкам: ад Br300 да Br4 тыс. штомесяц
Сталі вядомыя падрабязнасці падпісанага Прэзідэнтам Беларусі ўказа «Аб матэрыяльным стымуляванні работнікаў аховы здароўя». У адпаведнасці з дакументам, медыцынскім работнікам за працу ва ўмовах, звязаных з інфекцыямі, устаноўлена штомесячная надбаўка, памер якой дыферэнцаваны па арганізацыях (структурных падраздзяленнях) і катэгорыях работнікаў.
Сэрвіс для анлайн-дыягностыкі сімптомаў каранавіруса стварылі ў Беларусі
Рэзідэнт Парка высокіх тэхналогій кампанія Grin IT запусціла анлайн-сэрвіс sensmd.com для вызначэння групы рызыкі карыстальніка і верагоднасці яго заражэння COVID-19. Пра гэта паведамілі ў прэс-службе ПВТ. Sens MD – гэта бясплатны інструмент, які дазваляе рэгулярна ў хатніх умовах праводзіць анлайн-дыягностыку сімптомаў каранавіруса, а таксама атрымліваць рэкамендацыі па далейшых дзеяннях.
Больш за 76 тыс. тэстаў на каранавірус праведзена ў Беларусі
У Беларусі на 15 красавіка праведзена 76198 тэстаў на каранавірусную інфекцыю, паведамілі ў прэс-службе Міністэрства аховы здароўя. Для тэсціравання задзейнічаны 24 лабараторыі. Яны адкрыты як у рэспубліканскіх навукова-практычных цэнтрах і цэнтрах гігіены, эпідэміялогіі і грамадскага здароўя, так і ў прыватных медыцынскіх цэнтрах. Зарэгістраваны 3728 чалавек з наяўнасцю каранавіруснай інфекцыі. У прэс-службе ўдакладнілі, што 68 пацыентаў маюць патрэбу ў падтрымцы апарата штучнай вентыляцыі лёгкіх.
У Беларусі праведзена больш за 71,8 тыс. тэстаў на COVID-19
Па стане на 14 красавіка ў Беларусі праведзена 71 тыс. 875 тэстаў на каранавірусную інфекцыю, паведамілі ў прэс-службе Міністэрства аховы здароўя. Для тэсціравання задзейнічаны 17 лабараторый. Зарэгістраваны 3281 чалавек з наяўнасцю каранавіруснай інфекцыі. «З іх шпіталізаваны 2444 чалавекі. У астатняй часткі пацыентаў захворванне праходзіць у лёгкай форме, яны лечацца амбулаторна», - удакладнілі ў прэс-службе.
Бессімптомная перадача каранавіруса можа адбывацца ў 70 працэнтах выпадкаў – вучоныя
На думку сінгапурскіх вучоных, перадача каранавіруса ад бессімптомных носьбітаў з'яўляецца адным з галоўных выклікаў барацьбы з ім, паведамляе ТАСС са спасылкай на газету The Straits Times. Вынікі даследаванняў паказваюць, што ад 50 да 70 працэнтаў ужо інфіцыраваных COVID-19 не маюць ніякіх сімптомаў, у такім стане яны могуць знаходзіцца да чатырох тыдняў, распаўсюджваючы пры гэтым вірус, адзначаюць сінгапурскія спецыялісты па інфекцыйных захворваннях.
На грошы Беларускага фонду міру закупленыя сродкі індывідуальнай абароны і антысептыкі для медустаноў Магілёва
Больш за Br40 тыс. вылучыла рэгіёну Магілёўскае абласное аддзяленне Беларускага фонду міру для забеспячэння якаснай і бяспечнай працы медыкаў у сувязі з пандэміяй каранавіруснай інфекцыі. Як паведаміла намеснік галоўнага ўрача Магілёўскай цэнтральнай паліклінікі Ала Ляховіч, з гэтых грошай больш чым на Br10 тыс. ужо набытыя сродкі індывідуальнай абароны, аптэсептыкі і інш. Для амбулаторна-паліклінічных устаноў абласнога цэнтра (дзіцячых і дарослых паліклінік, у тым ліку стаматалагічных), станцыі хуткай медыцынскай дапамогі, Дома дзіцяці, бальніцы сястрынскага догляду.
Амаль 68 тыс. тэстаў на каранавірус праведзена ў Беларусі
У Беларусі па стане на 13 красавіка праведзена амаль 68 тыс. тэстаў на каранавірусную інфекцыю. Задзейнічаны рэсурсы 17 лабараторый, як паведамілі ў прэс-службе Міністэрства аховы здароўя. Зарэгістравана 2919 чалавек з наяўнасцю каранавіруснай інфекцыі. У большай часткі пацыентаў захворванне працякае ў лёгкай ці сярэдняй форме, 55 мае патрэбу ў падтрымцы апарата штучнай вентыляцыі лёгкіх. Пасля лячэння выздаравелі і выпісаны 203 чалавекі. Памерла 29 пацыентаў з шэрагам хранічных захворванняў з выяўленай каранавіруснай інфекцыяй.
Бацькам будуць выдаваць даведку на час самаізаляцыі дзяцей–кантактаў па COVID-19
Бацькам будуць выдаваць даведку аб часовай непрацаздольнасці на час самаізаляцыі іх дзяцей, якія сталі кантактамі першага або другога ўзроўню ў сувязі з COVID-19, паведамілі ў прэс-службе Міністэрства аховы здароўя, каментуючы пастанову ведамства № 34 ад 9 красавіка 2020 года. Дакумент уносіць змены ў Інструкцыю аб парадку правядзення экспертызы часовай непрацаздольнасці, зацверджаную пастановай Міністэрства аховы здароўя № 104 ад 24 снежня 2014 года.
Алена Богдан: рост колькасці інфіцыраваных COVID-19 у Беларусі – прагназаваная тэндэнцыя
Рост колькасці інфіцыраваных COVID-19 у Беларусі–прагназаваная тэндэнцыя. Пра гэта ў эфіры тэлеканала СТВ паведаміла намеснік міністра аховы здароўя Алена Богдан. Алена Богдан пракаментавала дастаткова сур’ёзны рост колькасці інфіцыраваных. «Натуральна, гэта чакана, гэта прагназавана. І як бы нам ні хацелася, каб гэтага росту не было, усё роўна вопыт іншых краін паказвае, што тэмпы захворвання будуць павялічвацца», – канстатавала яна.
Дабрачынная акцыя «Белай Русі» па падтрымцы медработнікаў стартавала ў Магілёўскай вобласці
Дабрачынная акцыя РГА «Белая Русь» па падтрымцы медработнікаў стартавала 9 красавіка ў Магілёўскай вобласці. На яе першым этапе Магілёўскай абласной бальніцы № 1 перададзена больш за Br4 тыс. на закупку хірургічных камплектаў. Гэтыя дадатковыя сродкі абароны стануць неад’емным элементам экіпіроўкі медыцынскіх работнікаў пры кантакце з носьбітамі каранавіруснайінфекцыі і пацыентамі, якія знаходзяцца на стацыянарным назіранні як кантактуючыя з заражанымі.
Больш як 49 тыс. тэстаў на каранавірус праведзена ў Беларусі
У Беларусі па стане на 9 красавіка праведзена больш як 49 тыс. тэстаў на каранавірусную інфекцыю, паведамілі ў прэс-службе Міністэрства аховы здароўя. «За суткі ў краіне праводзіцца амаль 3 тыс. тэстаў», - праінфармавалі ў прэс-службе. Пры гэтым, як адзначаюць спецыялісты Інстытута Роберта Коха (Федэральны інстытут Германіі па вывучэнні інфекцыйных захворванняў і непераносных хвароб), рост колькасці дадатных вынікаў прапарцыянальны павелічэнню колькасці праведзеных тэстаў. У правядзенні тэсціравання задзейнічана 14 лабараторый.
Навучэнцы Магілёўскага абласнога ліцэя № 3 звярнуліся са словамі падтрымкі да медыцынскіх работнікаў
Акцыі падзякі і падтрымкі ўрачоў праходзяць па ўсім свеце. Менавіта медработнікі, знаходзячыся ў групе рызыкі, нялёгкай паўсядзённай працай абараняюць найвялікшыя каштоўнасці, падараваныя чалавеку, – яго жыццё і здароўе. Таму кожнае, нават ледзь чутнае, самае маленькае «дзякуй» становіцца гучным і значным, у сто разоў узмацняецца, паказвае, наколькі неацэнная праца кожнага чалавека ў белым халаце.
Місія СААЗ прыбыла ў Беларусь
Місія СААЗ прыбыла ў Беларусь увечары 7 красавіка, паведамілі ў прэс-службе Міністэрства аховы здароўя. У склад дэлегацыі ўвайшлі тры эксперты. Афіцыйная праца місіі пачнецца 8 красавіка і працягнецца да суботы – 11 красавіка. Экспертам будзе прадастаўлена магчымасць на месцы ацаніць рэальную сітуацыю, адэкватнасць мер, якія прымаюцца, прааналізаваць падыходы да аказання медыцынскай дапамогі. Плануецца, што спецыялісты наведаюць установы аховы здароўя Мінска, а таксама Мінскай і Віцебскай абласцей.
Міністр аховы здароўя Уладзімір Каранік і галоўныя ўрачы дзвюх бальніц адказваюць на пытанні аб COVID-19 у прамым эфіры
Запрашаем далучыцца да прамой трансляцыі на youtube-канале Нацыянальнага прэс-цэнтра Рэспублікі Беларусь «Найбольш актуальныя тэмы і задаваемыя пытанні аб COVID-19».
За суткі колькасць хворых на каранавірус у Магілёўскай вобласці вырасла на 5 чалавек
На сённяшні дзень, 7 красавіка, устаноўлены 21 выпадак каранавіруснай інфекцыі ў Магілёўскай вобласці. Паводле інфармацыі галоўнага дзяржаўнага санітарнага ўрача Магілёўскай вобласці Святланы Нячай, апошнія зарэгістраваныя выпадкі інфекцыі – гэта пацверджаныя факты кантактаў першага ўзроўню па раней выяўленых захворваннях. Асноўныя тэрыторыі распаўсюджвання віруса засталіся ранейшымі. Пры гэтым інфекцыяністы кажуць, што па асобных даследаваннях ідзе пацвярджэнне вынікаў, таму названая колькасць захварэлых на каранавірус будзе павялічвацца.
У Беларусі ёсць тэст-сістэмы для больш як 20 тыс. даследаванняў на каранавірус
У Беларусі ёсць тэст-сістэмы для правядзення больш як 20 тыс. даследаванняў. Аб гэтым паведаміла 6 красавіка ў эфіры праграмы «Панарама» на тэлеканале «Беларусь 1» намеснік дырэктара па навуковай рабоце РНПЦ эпідэміялогіі і мікрабіялогіі Аліна Дроніна. «Толькі лабараторыя РНПЦ эпідэміялогіі і мікрабіялогіі выконвае амаль 700 тэстаў у дзень. Цяпер у рэспубліцы працуюць 13 лабараторый», - сказала Аліна Дроніна.
Расія перадасць Беларусі 10 тыс. тэстаў на каранавірус
Дыягнастычны матэрыял для правядзення 10 тыс. даследаванняў на каранавірус COVID-19 бясплатна будзе перададзены беларускаму боку. Пра гэта паведаміў журналістам пасол Расіі ў Беларусі Дзмітрый Мезенцаў. Тэставыя сістэмы даставяць аўтамабілем-рэфрыжэратарам, у якім будзе падтрымлівацца спецыяльны тэмпературны рэжым мінус 20 градусаў.
У Беларусі зарэгістраваны 351 выпадак каранавіруснай інфекцыі
У Беларусі зарэгістраваны 351 выпадак каранавіруснай інфекцыі, паведаміла сёння журналістам намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан. Адзін выпадак ёсць у Брэсцкай вобласці, два - у Магілёўскай. У Віцебскай вобласці зарэгістравана 89 выпадкаў, у Гомельскай - 13, у Гродзенскай - шэсць. У Мінску выяўлена 190 выпадкаў каранавіруснай інфекцыі, у Мінскай вобласці - 50, праінфармавала Іна Карабан.
СААЗ перадала ў Беларусь наборы для правядзення 6 тыс. тэстаў на каранавірус
Сусветная арганізацыя аховы здароўя перадала ў Беларусь наборы нямецкай вытворчасці для правядзення 6 тыс. тэстаў на каранавірус COVID-19, паведамілі ў прадстаўніцтве ААН у Беларусі. «Усе тэсты ўжо знаходзяцца ў лабараторыі РНПЦ эпідэміялогіі і мікрабіялогіі», - гаворыцца ў паведамленні. СААЗ ужо накіравала больш за 1,5 млн набораў для тэстаў у 120 краін. Як раней паведамлялі ў Міністэрстве аховы здароўя Беларусі, у краіне ёсць як айчынныя, так і імпартныя тэст-сістэмы. Працуюць дзевяць лабараторый, яшчэ тры будуць запушчаны пры неабходнасці.
У стацыянарах Беларусі знаходзяцца 254 пацыенты з каранавірусам
У стацыянарах Беларусі знаходзяцца 254 чалавекі з пацверджанай каранавіруснай інфекцыяй, як паведамілі ў прэс-службе Міністэрства аховы здароўя. «У Беларусі рэгіструецца паступальнае павелічэнне колькасці хворых COVID-19. Большасць выпадкаў–гэта выяўленыя кантакты 1 і 2 узроўняў», – адзначылі ў прэс-службе.
У Магілёўскай вобласці дадаткова закупяць чатыры боксы біялагічнай абароны для транспарціроўкі хворых
У Магілёўскай вобласці дадаткова закупяць для ўстаноў аховы здароўя чатыры боксы біялагічнай абароны для транспарціроўкі пацыентаў з віруснымі і інфекцыйнымі захворваннямі, паведаміў начальнік галоўнага ўпраўлення па ахове здароўя Магілёўскага аблвыканкама Аляксандр Старавойтаў.
Пацыентаў з COVID-19 шпіталізуюць у першыя гадзіны пасля пацвярджэння дыягназу – Міністэрства аховы здароўя
Пацыентаў з каранавіруснай інфекцыяй COVID-19 шпіталізуюць у першыя ж гадзіны пасля пацвярджэння дыягназу, як паведаміла намеснік галоўнага ўрача Рэспубліканскага цэнтра гігіены, эпідэміялогіі і грамадскага здароўя Ірына Глінская.
У Беларусі праведзена больш за 30 тыс. тэстаў на каранавірус
У Беларусі на сёння праведзена больш за 30 тыс. тэстаў на каранавірусную інфекцыю, як паведамілі ў прэс-службе Міністэрства аховы здароўя. «Працягваюцца мерапрыемствы па кантролі за эпідэміялагічнай абстаноўкай. У выпадку неабходнасці праводзіцца шпіталізацыя пацыентаў для далейшага назірання і абследавання», – адзначылі ў прэс-службе. За мінулыя суткі шпіталізавана 110 чалавек, выпісана 144, у тым ліку тыя, хто меў кантакты з носьбітамі інфекцыі.
Валанцёры Чырвонага Крыжа дапамагаюць пажылым і інвалідам у перыяд самаізаляцыі
Падтрымка пажылых і інвалідаў – адзін з прыярытэтных напрамкаў работы грамадскай арганізацыі «Чырвоны Крыж». Цяпер людзям з групы рызыкі дапамога патрэбна як ніколі. У Магілёўскай вобласці сфарміраваныя валанцёрскія атрады, якія прайшлі інструктаж і атрымалі прадметы абароны: маскі, пальчаткі, антысептыкі. Валанцёры дастаўляюць пажылым людзям лекі, прадукты харчавання і іншыя прадметы першай неабходнасці. Яны тлумачаць, чаму важная самаізаляцыя, і раздаюць памяткі-рэкамендацыі ў сувязі з распаўсюджваннем каранавіруса.